Алматыда 4 жаңа мектеп ашылады

Алматыда жыл соңына дейін 4 жаңа мектеп ашылады. Оларда 6 700 бала оқиды. Білім беру нысандары «Келешек мектептері» ұлттық жобасы аясында салынып жатыр.

13 жаңа мектеп ашылды

«Келешек мектептері» - әр ата-ананың арманы. Өйткені мұнда балалар кең, жайлы, заманауи кабинеттерде оқиды. Осындай орта оқушылардың оқуға деген ынтасын арттырып, ғылым мен техникаға қызығушылығын күшейтеді.

Баймұқан Закиров, Ата-ана:

- Немеремді алып келдім. Немерем өте қуанышты. Бұл жерде барлық жағдай жасалған. Қамтамасыз етілген. Керек нәрсенің барлығы бар. Немерем домбыраға қызығады домбыра үйрететін ағайлар бар. Бұрынғы мектепке қарағанда бұл мектепті салыстыру өте айырмашылығы үлкен.

Мектептердің әрқайсысында төрт спорт залы, теннис корты бар. Ғимараттар типтік мектептерден 20 пайызға үлкенірек салынған, бұл балаларға еркін қозғалуға, ойнауға және шығармашылықпен айналысуға қосымша кеңістік береді.

Қарлығаш Акмурзаева, Алматы қаласы Алатау аудандық білім бөлімінің басшысы:

- Келешек мектептер жобасы аясында 34 800 орынға арналған 21 мектеп енгізілген. Соның ішінде биыл 23100 арналған 13 мектеп өзінің жұмысын бастап балаларға білім беріп жатыр. Қыркүйек айында 7 мектеп ашылса екінші тоқсанның бас кезінде Алматы қаласы бойынша 5 мектеп ашылды.

Мектептерде STEM-зертханалары, робот техникасы кабинеттері, коворкинг аймақтары, хореография залдары да қарастырылған. Ал ағаш өңдеу мен тігін үйірмелері балаларға ерте кәсіби бағдар алуға мүмкіндік береді

Ақнұр Нұралиева, Алматы қаласы Медеу аудандық білім бөлімінің басшысы

- Келешек мектептер бір ауысымда жұмыс жасайды. Екінші ауысымда балалар қосымша үйірмелерде тәрбиеленеді. Барлық кабинеттер қосымша үйірмедегі жаңа жабдықтармен, жаңа технологиялармен жабдықталған.

Қалада жыл соңына дейін 4 мектептің құрылысы аяқталады. Олардың ашылуы келер жылдың алғашқы тоқсанына жоспарланған.