«Болашақ» стипендиясын тағайындау ережелері өзгерді

Енді жасанды интеллект және атом энергетикасы мамандары «Болашақ» бағдарламасымен оқи алады. Мемлекеттік кеңесші «Шетелде кадрлар даярлау жөніндегі республикалық комиссияның» кезекті отырысын өткізді. Ерлан Қарин «Болашақ» стипендиясын тағайындау ережелерінің өзгергенін айтты. Енді үміткерлер үш бірдей іріктеуден өтеді. Кешенді тест және сұхбаттан кейін ең жоғары ұпай жинағандар Республикалық комиссияның сынынан өтеді. Сыннан сүрінгендер бір жыл ішінде конкурсқа қайта қатыса алады. Шетелдік университеттерге де талап күшейді. Олар халықаралық рейтингтердің үздік жүздігінде болуы керек. Сонымен биыл 225 азаматымызға «Болашақ» стипендиясы тағайындалды. Бір орынға 4 үміткер таласты. Степендиаттардың 152-сі – магистратурада, 16-ы докторантурада оқиды. Ал 57 отандасымыз кәсіби тағылымдамадан өтеді. 182 ғалым әлемнің жетекші ғылыми және зерттеу орталықтарында тәжірибе жинау үшін грант алды. Бұл жерде де талап күшейді. Олардың беделді басылымдарда шыққан ғылыми мақалалары мен халықаралық патенттері болуы міндетті. Осы тағылымдама тізіміне енді «Жасанды интеллект жүйесін пайдаланушылар» деген жаңа санат қосылды.