Әлемдегі ең үздік 50 педагогтің бірі – қазақ ұстазы Татьяна Белоусова

Әлемдегі үздік 50 педагогтің бірі атанған ұстаз Татьяна Белоусова Алматыдағы №95 мектеп‑лицейде физика пәнінен сабақ береді. 40 жылдық ғұрымын бала оқытуға арнаған. Global Teacher Prize халықаралық байқауы білім беру саласында «Нобель сыйлығы» парапар. Үздік ұстазбен біздің түсірілім тобы тілдесіп қайтқан еді. 

Халықаралық байқауға әлемнің 140 елінен 40 мыңға жуық мұғалім қатысқан. Татьяна Белоусова екі жыл бұрын «Қазақстанның үздік мұғалімі» атанса, былтыр әлемнің үздік 100 педагогінің қатарына енді. Ал мына байқау білікті ұстаздың еңбегің тағы бір мәрте еселеді.

Татьяна Белоусова, №95 мектеп-лицейдің химия пәні мұғалімі:

- Мен үшін бұл ең жоғары марапаттардың бірі. Бұл тек жеке жетістігім емес, елім үшін де үлкен абырой. Себебі байқауда мен өзімді ғана емес, №95 мектеп-лицейді және Қазақстанды таныстырып отырмын. Бұл мен үшін зор мақтаныш. Мен Қазақстанда туып-өстім, осында еңбек етіп келемін. Сондықтан еліміздегі білім беру жүйесі мен мектептер ең үздік деңгейде болуы тиіс деп есептеймін.

Педагог химия пәнінен 40 жылдан астам уақыт бойы сабақ беріп келеді. Заман ағысынан қалмауға тырысады. Сабақтан тыс уақытында халықаралық білім беру платформасында орыс және ағылшын тілдерінде дәріс өткізеді.

Ясмин Дармешева, 11-сынып оқушысы:

- Сабақтар өте қызықты өтеді. Біз теорияны оқып, кейін тәжірибе жасаймыз, қышқылдар мен басқа реагенттерді араластырамыз. Татьяна Геннадьевна сияқты ұстаздың арқасында біз жақсы нәтижелерге жетіп жатырмыз.

Қазақстан бұл беделді байқауға бесінші рет қатысып отыр. Осы уақытқа дейін еліміздің белді ұстаздары екі мәрте әлемнің үздік 50 педагогінің қатарына енген.

Айгүл Сағындықова, №95 мектеп-лицейінің қазақ тілі мен әдебиеті пәні мұғалімі:

- Осындай мұғалім біздің еліміздің, мектебіміздің атын әлемге шығарып жатқанын мақтан тұтамыз. Татьяна Геннадьевна заман талабына сай мықты маман. Осындай мұғаліммен бір жұмыс істеген біз үшін үлкен мәртебе.

Бүгін Татьяна Белоусованы халықаралық деңгейдегі жетістігімен Мемлекет басшысы құттықтады. Әлемнің үздік 50 мұғалімінің ресми тізімі былтыр 15 желтоқсанда жарияланған. Ал марапаттау рәсімі ақпан айында Дубайда өтеді.

Гүлзат Сақ, Ерік Керімқұлов