Қазақстан дипломын Азия-Тынық мұхиты елдері де мойындайды

Енді Қазақстанда білім алған азаматтардың дипломы Азия-Тынық мұхит елдерінде де мойындалады. Бүгін Сенат депутаттары біліктілікті тану туралы халықаралық Токио конвенциясын мақұлдады. Оған сәйкес, Қазақстанда білім алып, мәселен Жапонияға жұмыс істеуге барған азамат өзінің дипломының заңды екенін дәлелдеп, уақыт жоғалтпайды. Бұл әсіресе оқытушы статусындағы азаматтарға қатысты. Яғни, Токио конвенциясына сәйкес Қазақстан оннан астам елмен біліктілікті тану жөніндегі Ұлттық ақпараттық орталыққа қосылған. Оған мүше елден бізге келген мамандар да дәл осы жүйені қолданады. Айта кетейік, Токио конвенциясына Ауғанстан, Армения, Аустралия, Қытай, Фиджи, Жапония, Моңғолия, Жаңа Зеландия, Корея Республикасы, Ресей және Түркия сияқты он екі мемлекет кіреді.

Әсем Рахметова, ҚР Парламенті Сенатының депутаты:

- Бұл конвенцияға үлкен үміт артылып отыр. Өйткені шетелден бізге мұғалімдер келетін болса, олардың біліктіліктері бізге келе ма, келмей ма? Егер де біздің оқытушыларымыз шетелге барып қызмет атқаратын болса, ол біліктіліктерді тани ма, танымай ма? Яғни, біздің мықты деген оқытушыларымыз ол жаққа барып, қара жұмыс істемесін деген мақсат қой.