Өткізу бекеттерінде санитарлық-карантиндік бақылау күшейтілді

Маймыл шешегіне бола алаңдауға негіз жоқ. Қазақстанда қауіпті індетті жұқтыру дерегі тіркелмеді. Бүгін Үкімет отырысында Премьер-Министр осылай деді. Олжас Бектенов арқаны кеңге салуға болмайтынын да айтты. Осыған орай Денсаулық сақтау министрлігіне елдегі ахуалды бақылауда ұстап, алдын алу шараларын қабылдауды тапсырды. Бұл әсіресе, әуежайлар мен шекарадағы өткізу бекеттеріне қатысты.

Айта кетейік, бұл мәселе күн тәртібінен тыс қаралды. Денсаулық сақтау вице-министрі Ержан Нұрлыбаевтың айтуынша, ел аумағында індеттің пайда болу қаупі аз. Осыған қарамастан, министрлік бұл инфекцияның таралуына жол бермеу үшін барлық қажетті алдын алу шараларын қабылдап жатыр. Мемлекеттік шекара арқылы өткізу бекеттерінде санитарлық-карантиндік бақылау күшейтілді.