Face ID мен саусақ іздерін жинау бақылауға алынады

Енді азаматтар өздерінің жеке деректерін жасыруға құқылы. Бұл туралы жасанды интеллект және цифрлық даму вице-министрі мәлімдеді. Процесс жақында қабылданған Цифрлық кодекс аясында жүзеге асады. Бұдан бөлек, Face ID мен саусақ іздерін жинау қатаң бақылауға алынады. Әрі, жасанды интеллект арқылы жасалған фото-видеоларды міндетті таңбалау тетігі де енгізілді. Бұл түрлі алаяқтықтың алдын алуға ықпал етеді, - дейді мамандар. Ашық деректерге сүйенсек, былтыр 28 мыңнан аса азамат интернет-алаяқтықтың құрбаны болған.

Енді қандайда бір электронды қызмет алатын кезде Face ID-ден өтудің қажеті жоқ. Биометрия тек заңда көрсетілген жағдайларда ғана сұралады. Ал, электронды құжатты электрондық цифрлы қолтаңба немесе, SMS-кодтар арқылы ғана ресми растауға болады. Себебі, бет әлпетті қолдану алаяқтарға тегін олжа болып отыр. Цифрлық кодекс 109 баптан тұрады. Жаңа нормада қауіпсіздік пен қорғаныс қағидаттары аралығындағы мәселелер толық қамтылған.

Дмитрий Мун, ҚР Жасанды интеллект және цифрлық даму вице-министрі:

- Цифрлық кодексте алғаш рет адамдардың цифрлық құқықтары заңнамалық тұрғыда бекітілді. Азаматтарға дербес деректерді жою, оларды өңдеуді шектеу, жасыру құқығы берілді. Сондай-ақ, алгоритмдік және автоматтандырылған жүйелердің көмегімен қабылданған шешімдерді уәкілетті мамандардың қатысуымен қайта қарау құқығы енгізілді.

Кодексте киберқауіпсіздік мәселелеріне ерекше назар аударылған. Цифрлық нысандарды, деректер мен инфрақұрылымды қорғаудың жаңа стандарттары белгіленеді. Мәселен, егов порталында жеке деректерді бақылауға арналған деген бөлім бар. Осы бөлім арқылы кез-келген азамат өз жеке деректерін кім, қашан, қандай мақсатта қарағанын көре алады. Ал, егер деректер тарап кетсе жауапты министрлікке арыз жазуға болады.

Екатерина Смышляева, ҚР Парламенті Мәжілісінің депутаты:

- Электрондық құжаттармен қатар цифрлық құжаттар, цифрлық мәліметтер және цифрлық растаулар ұғымдары енгізілді. Бұл азаматтардың құқықтары мен заңды мүдделеріне әсер ететін цифрлық және жасанды интеллект шешімдерінің ашықтығы мен есептілігін қамтамасыз етеді.

Айтпақшы, әлеуметтік желідегі контент те қатаң бақылауға алынады. Әсіресе, жасанды интеллект құралын пайдаланып, жалған ақпарат таратуға рұқсат жоқ. Егер ондайға барсаңыз, қомақты айыппұл төлейсіз. 15-тен 100 АЕК дейін. Тек жасанды интеллектіні адамзаттың дамуына пайдасы бар дүниелер үшін ғана қолдануға рұқсат бар.

Авторы: Зұлқарнай Ермұратұлы