Азаматтық бастамаларды іске асыру принциптері

Мықты қоғамды қалай құруға болады? Шымкентте өткен 12-ші Азаматтық форумда осы мәселе талқыланды. Жиынға Үкіметтік емес ұйымдар, мемлекеттік құрылымдар мен бизнес өкілдері және жастар қатысты.

Әр азаматтың жеке пікірі кез келген іске қосқан үлесі болып саналады. Форумға қатысушылардың ортақ ойы осы. Өйткені, мұндай диалог алаңы билік пен қоғам арасындағы өзара түсіністік пен әріптестікті нығайтады. Шараға Шымкент қаласы әкімінің орынбасары мен ақпарат және мәдениет министрлігі өкілдері және 16 өңірден келген делегаттар қатысты.

Бану Нұрғазиева, ҚР Азаматтық Альянсының президенті:

- Азаматтық бастамаға сондай-ақ шешім қабылдауға қатысу, жалпы азаматтарды мемлекет ісіне тарту бұл өте маңызды шара. Өйткені олар бірінші кезекте Қазақстанның халқы. Сондай-ақ, елдің ең жарқын өкілдері. Оның ішінде маңызды проблемаларды көтеретін үкіметтік емес ұйымдарда бар. Бүгін біз осы мәселені талқылау үшін бас қосып отырмыз.

Форум аясында сессиялар мен ашық диалогтар өтті. Онда үкіметтік емес ұйымдардың жастары өзара іс-қимыл, азаматтық бақылау және үздік тәжірибелерді енгізу мәселелерін ортаға салды. Қатысушыларға әлеуметтік жобалар көрмесі ұсынылды.

Сара Имбарова, Шымкент қаласының Азаматтық ресурстық орталығының басшысы:

- Бұл форумның мақсаты барлық мүдделі тараптарды жинау. Қоғамның әрбір мүшесінің рөлі қандай екенін соның ішінде ҮЕҰ-ның ролін нақтылау. Шымкентті қолайлы қала ету үшін жасалып жатқан барлық мақсаттардың қандай екенін анықтау.

Форум қорытындысы бойынша Астанада өтетін республикалық Азаматтық форумға жіберілетін ұсыныстар мен бастамалар тұжырымдамасы бекітілді.