Астана жаңа жылды қарсы алуға дайын

Астанадағы алты ауданға шыршалар қойылды. Қалада жаңа жылдық көңіл-күй байқалады. Мұнда шанасын сүйреткен балалар мен жастар көп. Тіпті күннің суығына қарамастан, тұрғындар қысқы қалашықтарда көңіл көтеріп жүр.

Астана көшелері осындай жарық шамдармен безендірілген. Биыл қалада жалпы 40 шырша орнатылыпты. Мұнда архитектуралық мүсіндер мен балалар сырғанағы да бар.

Қаладағы 6 ауданда да арнайы қысқы қалашықтар жасалған. Басты ерекшелігі балалар коньки тебе алады, мұзайдында сырғанай алады. Мұнда қыстың ызғары мен боранына қарамастан тұрғындар емін-еркін көңіл-көтеруде. Әсіресе кешке ине шаншар орын болмайды.

Орталық алаңдағы шыршалардың биіктігі 20 метрден кем емес. Олар Астанадағы жұрт көп жүретін саябақтарда орналасқан. Бұл қатарда Ботаникалық саябақ, Қазақ елі монументі мен Астана арена да бар. Бірер күн бұрын қаладағы барлық шырша бір уақытта жарқырады. Мұнда фуд корттар мен сиқырға толы Аяз ата үйі де орналасқан.

Авторы: Мақпал Рахатқызы