Салымшылардың зейнетақы жинағы азайды

Салымшылардың табан асты зейнетақы қорындағы табыстары азайып кетті. Содан үй аламын деп алақанын ысып отырған көпшіліктің үміті үзілді. Экономисттер қордағы жинақтың құлдыруын - доллардың қымбаттап, теңгенің құнсыздануынан көріп отыр.

Қазір қорадағы малдан гөрі, қордағы ақша уайым. Өйткені, бірінің иесі өзің, ал, екіншісін сеніп тапсырасың. Әңгіме жинақтаушы зейнетақы қорына қатысты. Егер ондағы қаржы сәл көбейсе төбең көкке жетеді. Кемісе салың суға кетеді. Себебін іздеп, сергелдеңге түсесің. Жуырда әлеуметтік желіде сондай жазбалар көбейді, видеолар да тарады. Доллар көтерілсе қымбатшылық қысады, құнсызданса қордағы жинақ құлдырайды.

Сәбит Рысбаев, Экономист:

- Қазіргі уақытта зейнетақы жүйесіндегі ақшаның минусқа кетіп қалғаны рас. Ол бірінші кезекте доллардың құнсызданғанының себебінен. Ал, ол жақтағы, зейнетақыдағы ақшаның көбі доллармен болғандықтан минусқа кетіп жатыр. Бірақ, қазіргі уақытта бізде таңдау бар. Ең минусқа кеткен Ұлттық банктегі зейнетақы қорындағы ақша. Жылдың соңына дейін күткен дұрыс. Жылдың соңында плюске шығып ол ақша өзін жабады деп ойлаймын. Сонда да тек Ұлттық банкке тапсырып қоймай, альтернативті түрде 50 пайызын басқа қорларға да салуға болады.

1-ші қаңтарда бірыңғай жинақтаушы зейнетақы қорында 22 трлн 80 млрд теңге болды. Былтыр инвестициялық кіріс көбейді. 36 пайызға дейін артып, 3 трлн 335 млрд теңгеге жуықтаған. Бұл 2023 жылғы түсімге қарағанда 2 трлн теңгедей артық. Сонымен соңғы 12 айда қордан 1 трлн 324 млрд теңге төлем жасалған. 407 млрд.тан астамы тұрғын үй жағдайын жақсартуға, тағы 180 млрд теңгедей емделуге берілген. Млн таппаған жұрт трлн-дардың тілін түсінбеуі мүмкін. Бірақ, жоғарыдағы сомалар соншама көрсеткіш емес, - дейді сарапшы.

Нұржан Бияқаев, Банк саласы бойынша тәуелсіз сарапшы:

- Қор нарығына қарасақ бірыңғай жинақтаушы зейнетақы қорының қарқыны баяу. Турасын айтсақ табысы төмен. Салыстырсақ мемлекетке қарамайтын сақтандыру компаниялары көбірек түсім түсіреді. Осы ретте бірыңғай жинақтаушы зейнетақы қорының басшылығы мен менеджменті жұмысты қалай үйлестіріп отыр деген сұрақ туады? Мен түрлі қор нарығын зерттеп, жұмыс істеуге кеңес берер едім. Яғни, әртараптандыру керек. Мысалы, брокерлік тәсіл тиімді.

Зейнетақы қорын қызғыштай қору керек, - дейді қаржы сарапшылары. Яғни, инвестициялық саясатты іске асыруда асығыс шешім қабылдауға болмайды. Себебі, ондағы ақша 12 млн.нан аса адамның еңбек ақысы. Ал, оны құнсыздандыруға ешкімнің құқы жоқ.