Жастар жазда жұмыссыз жүрмейді

Елорда жастары ала жаздай жұмыссыз жүрмейді. Себебі олардың «Жасыл ел» қатарында еңбек етіп, табиғатты түлетуге өз үлесін қосуына мүмкіндігі бар. Биыл Астанада «Жасыл ел» жастар еңбек жасақтарының XXI маусымы басталды. Салтанатты ашылу рәсіміне жүздеген жас жиналған. Олардың қатарында мектеп, колледж, университет студенттері мен еріктілері бар. 

Бижан – Астанадағы колледждердің бірінде оқиды. Ол жазғы демалысын босқа өткізбей, пайдасы мол жұмыспен айналысуды жөн көрген. Өткен жылы алған тәжірибесі мен достарымен бірге еңбек ету мүмкіндігі оны биыл да «Жасыл елге» қайтарған. Ол – биылғы маусымның мыңдаған қатысушысының бірі. Жасыл ел құрамында еңбек ету – жас үшін тәрбие, қоғам үшін көмек, дейді ол.

Жалпы «Жасыл ел» бағдарламасы елімізде 20 жылдан бері жүзеге асып келеді. Биылғы маусымда елордада 5200-ге жуық жас жұмысқа тартылмақ. Қатысушылардың қатарында көпбалалы және аз қамтылған отбасылардан шыққан жастар да бар. Ал негізі 14 жастан асқан жасөспірімдер күніне 4 сағат жұмыс істейді. Барлық жасақшылар арнайы құрал-жабдықтармен және біркелкі киіммен қамтамасыз етіледі.

Биылғы еңбек маусымының ұраны – «Астана – тазалық пен тәртіптің үлгісі». Ашылу рәсімінде бұл ұран жастарға еңбек мәдениетін қалыптастыру мен қоғамдық жауапкершілікті арттыруға бағытталғаны айтылды. Еңбек маусымы жаз бойы жалғасып, елорда тазалығы мен көркіне үлес қосады.