«Таза Қазақстан»: Ел бойынша 183 экологиялық акция өтті

«Таза Қазақстан» бастамасы аясында еліміздің барлық өңірінде 183 экологиялық акция өтті. Оған 6 миллион 200 мыңнан астам адам қатысты. Олардың ішінде 229 мың ерікті бар. Бұл туралы Президенттің кеңесшісі - баспасөз хатшысы Руслан Желдібай өзінің телеграм арнасында жазды. Экологиялық акцияның нәтижесінде 1 миллион 100 мың тоннадан аса қоқыс жиналып, 1 жарым миллионнан астам ағаш көшеті егілді. Рұқсат етілмеген қоқыс алаңдары айтарлықтай азайды. Егер 2018 жылы 9 мыңға жуық қоқыс орны анықталып, оның 57 пайызы жойылса, 2024 жылы 5 мыңға жуық қоқыс алаңы белгілі болып, оның 93 пайызы жойылды. Былтыр маусым айында @TazaQazBot чат-боты іске қосылды. Жұртшылық бұл платформаға өздері куә болған келеңсіз фактілерді хабарлай алады. Биыл «Таза Қазақстан» аясындағы экологиялық іс-шаралар наурыз айынан бастап оңтүстік және батыс өңірлерде қолға алынды. «Мемлекет басшысы айтқандай, «Таза Қазақстан» – бір реттік науқан емес. Ол отандастарымыздың қоршаған ортаға көзқарасын өзгертетін, өскелең ұрпақты туған жерге құрметпен қарауға тәрбиелейтін игі дәстүрге айналуға тиіс», - деп жазды Руслан Желдібай.