Ағаштар QR-кодпен таңбаланды

Алматы облысында ағаштар QR-кодпен таңбаланып жатыр. Экологиялық акция аясында мұнда 500 түп көшет отырғызылып, әрқайсысына цифрлық паспорт берілген. QR-код арқылы ағаш туралы толық ақпарат алып, оны кім отырғызды және күтім ережелері бойынша мағлұматтар алуға болады. Бұл – заманауи технологияны экологиялық тәрбиені қалыптастырудың жақсы құралы болмақ дейді мамандар. Игі бастама Талдыбұлақ ауылында «Таза Қазақстан» республикалық акциясы мен «Парктер шеруі- 2025» мерекесі аясында өтті. Бірінші шара Президент Қасым-Жомарт Тоқаевтың бастамасымен қолға алынса, екіншісі, яғни шеру Алматы мемлекеттік табиғи қорығының бастамасымен биыл 27-рет ұйымдастырылып отыр. Жас орманшылар табиғатты қорғауға ант беріп, жасыл галстук тағынды. Мақсаты - мектеп оқушылары табиғатты аялауға әзірден үйрету. Акция бір айға жалғасады.

Байрам Тұрсынов, «Табиғат» әдістемелік бірлестігінің жетекшісі:

- Негізгі мақсат: қазіргі өскелең ұрпақтың бойында тазалықты сақтау, өз еліне жеріне деген сүйіспеншілікті патриоттық сезімді ояту болды.

Серікәли Мақсатұлы, 11 - сынып оқушысы:

- Ағаш отырғызу ниетіміз болашаққа бір із қалдыру. Біздің еккен ағаштарымыз  тек қана көшет емес, болашаққа деген жауапкершілік нышанымыз.