Мексикадағы тәртіпсіздік: 23 тұтқын түрмеден қашып кетті

Мексикада тіркелген жаппай тәртіпсіздік әлі басылған жоқ. Бүгін түрмеден қатарынан 23 тұтқынның қашып кеткені туралы ақпарат жарияланды. Ресми мәліметке қарағанда, қашқындардың сыбайластары түрме аумағына басып кіріп, қақпаны бұзған. Оқ атқан. Бір күзетші көз жұмған. Жағдайдың бұлай ушығуына елдегі ең ірі есірткі картелі жетекшісінің өлтірілуі себеп болуда. Арнайы операциядан кейін оның жақтастары жолдарды жауып, көліктер мен коммерциялық нысандарды өртеген. Мексика президенті Клаудия Шейнбаум жағдай толық бақылауда екенін мәлімдеді. Қазір аймақта әуе рейстері уақытша тоқтатылған. Бұл жағдайға қатысты Қазақстан Сыртқы істер министрлігі де ескерту жасады. Қазақ азаматтарына қауіпті аймақ – Халиско штатының Пуэрто-Вальярта қаласына бармауға кеңес берген. Консулдық есепке сәйкес қазір Мексикада 35 Қазақстан азаматы жүр.