Кезектен тыс Президент сайлауы қай уақытта өтеді?

Мемлекет басшысы мерзімінен бұрын қызметтен кетсе 2 ай ішінде кезектен тыс Президент сайлау өтеді. Қасым-Жомарт Тоқаев заңға осындай норма енгізу қажет деді. Қазіргі Конституцияға сәйкес, Президент өз міндетін атқара алмайтындай оқыс жағдай туындаса, оның өкілеттілігі Сенат төрағасына беріледі. Бұл жерде екі ұшты ой тудыратын – «қалған мерзімге» деген сөз. Өйткені «қалған мерзім» 6 айдан, 6 жылға да созылуы мүмкін. Сондықтан Мемлекет басшысы мерзімінен бұрын қызметтен кетсе, «2 айдың ішінде кезектен тыс Президент сайлау өтеді» деген норма негізгі заңда нақты белгіленуі қажет. Бұл қадам халықаралық тәжірибеге сай келеді. Еліміздің кез келген басшысы билікке сайлау арқылы, яғни заңды түрде келу керек, - деді Президент Қызылорда өткен Ұлттық Құрылтай отырысында.