Қазақстанның 2029 жылға дейінгі Ұлттық даму жоспары әзірленді

Қазақстан алдағы бес жылда негізгі капиталға құйылатын инвестициялардың көлемін 4 есеге жуық ұлғайтуға ниетті. 2029 жылға дейінгі Ұлттық даму жоспары әзірленді. Осы уақытқа дейін отандық шағын және орта бизнестің ел экономикасындағы үлесі 37 ден 55% дейін жетуі тиіс. Стратегиялық құжатта жер қойнауы қазынаға толы елдің тау-кен өндірісін дамыту жағы да ескерілген. Межеленген аралықта минералды шикізат қоры зерттеліп, металл және өзге де пайдалы қазбаларды игеру мен олардың өндірісі 40% ұлғаймақ. Қазақстанның аймақтық сауда-логистикалық хаб ретіндегі көшбасшылығын сақтау қамында ел арқылы өтетін транзиттік тасымал көлемін 26 млн тоннадан 34 млн тоннаға дейін жеткізу мақсаты тұр. Жалпы елдің сандық және креативті экономикасын жаңғыртуға басымдық берілмек. 2029 жылға дейін инновациялық өнімдер өндірісі 2 есеге жуық артады. Тіпті 2026 жылға қарай IT-өнімдер мен қызметтердің экспортын кемінде 1 млрд долларға жеткізу көзделген. Ұлттық даму жоспарында экономиканы әртараптандырумен қатар, туризм, денсаулық сақтау, ғылым мен білімді дамыту, әлеуметтік қорғау салаларын дамытуға ден қойылады. Қазір, құжат қоғамдық талқылауда.