Қазақ ғалымдары жаңа тұқым түрлерін шығарды

Отандық селекционерлер жаңа тұқым түрлерін шығара бастады. Бұл жүгерінің буданы және құмай дақылдарының жаңа сұрпы. Оны Қазақ егіншілік және өсімдік шаруашылығының ғалымдары селекциялап шығарған. Енді олар агросаланы сапалы тұқыммен қамтамасыз ете алады. Сондай-ақ, импортқа тәуелділікті азайтып, азық-түлік қауіпсіздігін де күшейтеді. Толығырақ тілшіміз баяндайды.

Енді отандық диқандар жүгері мен басқа да дақылдарының жаңа тұқымдарын шетелден тасып әуре болмайды. Өзіміздің өнім– жергілікті топырақ пен климатқа бейімделіп, сұрыпталған. Сондықтан ыстық-суыққа, өсімдік аурулары мен зиянкестерге төзімді.

Шолпан Бастаубаева, Қазақ егіншілік және өсімдік шаруашылығы ҒЗИ басқарма төрағасы:

- Біздің міндетіміз - отандық тұқыммен толық қамтамасыз ету. Өйткені оны сырттан сатып алуға  қыруар қаражат жұмсалады. Шетелден әкелінетін тұқыммен бірге түрлі карантиндік арамшөптер мен зиянкестер де келеді. Біздің институт импорт тәуелділігін азайтып қана қоймай. осындай азық-түлік қауіпсіздігін қамтамасыз ете алады.

Институт базасында бұл тұқымдар бес кезеңнен тұратын тазалау мен өңдеуден өтеді. Өндірісте Қытай мен Чехиядан әкелінген заманауи жабдықтар қолданылады. Барлығы халықаралық стандарттарға сай.

Серік Қалтаев, Білім тарату орталығының басшысы:

- Мынау үшінші линия. Енді тағы бір линия ашылайын деп жатыр, органикалық. Қазіргі цифровизацияға байланысты, қазіргі сұранысқа байланысты органикалық завод салынып жатыр, жақында ол ашылады. Ол негізгі мақсаты - таза өнім беру, халыққа қамтамасыз ету. Биылғы жинаған тонна 180 тонна таза тұқымының өзі  100 тонна көлемінде болады.

Қазір селекционерлер сағатына екі тоннаға дейін тұқым шығара алады. Алдағы уақытта ірі зауыт салу жоспарланып отыр. Бұл елдің барлық өңіріндегі шаруашылықтарды сапалы отандық тұқыммен қамтуға мүмкіндік береді.