Абу Дабидің Тақ мұрагері мектеп-лицейге барды

Ақордадағы кездесуден кейін Президент пен Абу Дабидің Тақ мұрагері, шейх Халиф бен Заид - Әл Нахаян атындағы №84 мектеп-лицейге барды. Онда қонақтар араб тілі кабинетін көрді. Мектеп оқушылары араб тілі мен әдебиетін меңгеруде жеткен жетістіктерін көрсетті. Қазіргі кезде оқу ошағында 2800 бала білім алып, 159 педагог еңбек етеді. Биылғы оқу жылында «Цифрлы мектеп» жобасы дайындалып, жаратылыстану және математика пәндері 7 бағытта, атап айтқанда, IT STEM, FAB LAB, роботты техника, қолданбалы математика, биоинженерия, математикалық модельдеу, биохимия салаларына бөліп оқытылды. Оқушылар мектеп музейін де көрсетті. Онда екі елдің ынтымақтастығы мен достығына арналған көрме ұйымдастырылған. Экспозицияға ежелгі дәуірден бүгінге дейінгі араб әлемі жөнінде сыр шертетін кітаптар, ұлттық киім үлгілері мен тарихи жәдігерлер қойылған. Осыдан кейін Президент пен Тақ мұрагері «Этноауыл» көрмесін аралады.