«Астана жастары» зейнеткерлерге көмек көрсетіп жүр

Астана жастары ардагерлердің үйін аралап, қардан тазартып жүр. Әсіресе, еріктілер жалғызбасты әрі көмекке мұқтаж қарттарға қолқабыс болуда. Жастар ресурстық орталығы бастамашы болған мұндай қамқорлық жыл сайын мереке қарсаңында ұйымдастырылып тұрады. Әрі биыл «Таза Қазақстан» ұлттық жобасы да жүріп жатыр. Толығырақ әріптесім айтып берсін.

 «Қамқорлық мекенжайы» акциясы әдетте Тәуелсіздік күні, Жаңа жыл, Наурыз секілді маңызды мерекелер қарсаңында ұйымдастырылады. Биыл оған мыңға жуық волонтер тартылған. Олар ондаған зейнеткерге үй ішін жинауға, ауладағы қарды тазалауға көмектесіп, азық-түлік себеттерін табыстап жүр. Мәселен, Жәниә үшін мұндай шаралар үйреншікті іске айналған. Тек өткен жылдың өзінде ол отыздан астам акцияға қатысыпты.

Жәниә Нәдірқызы, ерікті:

- Өткен жылы қыс өте қарлы болды. Біз үнемі шығып, қар тазалауға көмектестік. Азық-түлік себеттерін жинадық, аула тазалауға бардық. Жалпы бұл жұмыс тұрақты түрде жүргізіледі.

Бүгін еріктілер елордалық зейнеткер Раида Мифтаховаға көмек көрсетті. Ол 87 жаста. Жолдасынан ерте айырылған, балалары жан-жаққа қоныс аударған. Ұзақ уақыттан бері жалғыз тұрып келе жатқан қарияға волонтерлер үнемі келіп, тұрмыстық жұмыстарға жәрдемдеседі. Өзі көмек көрсеткен жастарға көз жасын тыя алмай алғысын білдірді.

Раида Мифтахова, зейнеткер:

- Волонтерлерге үлкен рақмет. Көп көмектеседі. Әр келген сайын азық-түлік әкеледі, қар тазалайды, шөп шауып, картоп қазып береді. Барлығына мың алғыс.

Раида әжей Қазақстанға өткен ғасырдың 60-жылдары Башқұртстаннан келген. Айтуынша, жергілікті жұрт бірден жылы қарсы алған. Содан бері қоныстанған орыннан жылжаған емеспін дейді. Тағдырдың оны осы жерге алып келгеніне дән риза.

Раида Мифтахова, зейнеткер:

- Маған бұл жер қатты ұнайды, қазір туған өлкемдей болып кетті. Бұрынғы жерімді де ұмытып қалдым. Мұнда бәрі сыйлайды, көмектеседі. Тіпті кішкентай балалардың өзі «Баб Рая, сәлеметсіз бе?» деп амандасады. Бәрі таныс сияқты.

Айта кетейік, «Астана жастары» волонтерлік ұйымы тек жалғызбасты зейнеткерлерге ғана емес, көмекке мұқтаж кез-келген жанға қолдау көрсетеді.

Давид Шарипов, қоғам белсендісі:

- Біз мерекелер кезінде мыңдаған азық-түлік себетін мұқтаж отбасыларға таратуға қатыстық. Соңғысы қазан айының соңында өтті. Адамдарға көмектесудің, әсіресе ата-әжелерге қуаныш сыйлаудың қаншалықты керемет екенін сол кезде түсіндім.

Осындай игі шаралардың арқасында еріктілер қысқы мерекелер қарсаңында шынайы қамқорлық танытып, жылы атмосфера қалыптастырып жүр. Ал зейнеткер Раида Мифтахова біздің арна арқылы қазақстандықтарға Тәуелсіздік күнімен құттықтау жолдады.

Раида Мифтахова, зейнеткер:

- Баршаға тыныш өмір тілеймін. Балалар мен адамдар аман болсын. Ұзақ та бақытты өмір сүрейік, ең бастысы – елімізде бейбітшілік болсын.

«Қамқорлық мекенжайы» акциясынан бөлек, еріктілер өзге де қайырымдылық шараларына тұрақты қатысып келеді. Айта кету керек, аязды күндері олар қала көшелерінде еңбек етіп жүрген коммуналдық қызметкерлерге ыстық шай мен бауырсақ таратып, қолдау көрсеткен болатын.