Жастар тазалық акциясына қатысып жатыр

«Таза Қазақстан» экологиялық акциясы Жамбыл облысында да жалғасып жатыр. Бүгін Тараз жастары «Мамыр» саябағын қыс бойы жиналған қоқыстан тазалап, айналасына 150-ге жуық көшет отырғызып шықты. Экоакция тарихи нысан - Қарахан кесенесінде де жалғасты. Айта кету керек, өңірде 2 айдан бері «Таза қала», «Таза кәсіп - таза аймақ», «Жасыл қала», «Болашақты бірге отырғызамыз», «Жер сағаты» сынды шаралар өткізіліп келеді. Нәтижесінде 350 шақырым арық-атыздармен, 48 мың тұрғын үйдің ауласы, бір мың шақырымнан астам көше тазаланды. Барлығы 3 мың тоннаға жуық қоқыс шығарылды. 128 мың жуық көшет отырғызылып, 2 мыңнан астам қураған ағаш бұтағына санитарлық жұмыс жүргізіліпті. Мұның барлығына 150 техника тартылған.

Айбек Қадыралиев, Жастар ресурстық орталығының директоры:

- «Таза Қазақстан» акциясы - бұл жай ғана тазалық жұмыстары емес, өзекті экологиялық мәселелерді шешуге мол септігін тигізетін ауқымды жоба. Акция басталғалы бері облыста көптеген жұмыстар атқарылып, тазалық жұмыстары жүйелі түрде жүргізілуде. Бұл тұрғындар арасындағы экологиялық мәдениетті, өскелең ұрпақ арасында табиғатқа деген сүйіспеншілікті қалыптастыруға мол септігін тигізуде. Біз қоршаған ортаға аса жауапкершілікпен қарауға тиістіміз.