«Жастар рухы» - ашық форматтағы жиын

Медиа саласының ерекшеліктері, ақпарат кеңістігіндегі жаңа үрдістер, жастардың қоғамдық өмірдегі рөлі қандай? Астанада «Жастар Рухы» жастар қанатының белсенділері ашық форматтағы жиын өткізіп, осы мәселелерді талқылады. Жиынға танымал медиа тұлға Динара Сәтжан және Мәдениет және ақпарат министрінің кеңесшісі Әділ Сейфуллин қатысып, Жаңа Конституция жобасындағы жастар мен медиамен байланысты өзгерістерді талқылады. Тақырыпты әріптесім тарқатсын.

Жиынның шымылдығын түрген Динара Сәтжан жаңа Конституция жобасының маңызына тоқталды. Оның айтуынша, цифрлық дәуірде ақпараттық қауіптер көбейіп, дипфейк секілді технологиялар арқылы адамның бейнесі мен дауысын қолдан жасау мүмкіндігі артқан. Сондықтан азаматтардың құқығын қорғау үшін заңнаманы уақыт талабына сай жаңарту қажет

Динара Сәтжан, тележүргізуші:

- Біріншіден, маған жаңа Конституция жобасының қызу талқыланып жатқаны ұнайды. Бұл елдегі болып жатқан барлық үрдістерге бей-жай қарамайтын, жетілген қоғамның белгісі. Екіншіден, еліміз өркендеп, экономикамыз дамысын десек заман ағымына қарай бейімделіп отыруымыз керек. Мысалы, 10-20 жыл бұрын менің ойым, қарым-қабілетім басқа болды. Үздіксіз дамудың арқасында осы дәрежеге жеттім. Сол сияқты мемлекет те үнемі жетіліп отыру керек. Бүгін осы туралы сөйлестік.

Ал, Әділ Сейфуллин жастарды алдағы саяси науқанда белсенді болуға шақырды. Оның сөзінше, жаңа Конституция жобасында адами капиталға ерекше мән берілген.

Арсланбек Мағзұм, Жалпыұлттық коалиция мүшесі, қалалық Мәслихат депутаты:

- Жаңа Конституция жобасында қазіргі таңда көптеген өзгерістер енгізіліп жатыр. Оның барлығы да біздің құқығымызды қорғау, білім, инновация және отбасылық құндылықтарды дұрыс бағыт-бағдар беру аясында жасалған өзгерістер. Сондықтан біздің жалпыұлттық коалицияның басты мақсаты қазіргі таңда оның барлығын дұрыс түсіндіру.  

Кездесу еркін пікір алмасу форматында өтті. Айта кетейік, айтулы шараны Жалпыұлттық коалиция мүшелері мен Астана қаласы әкімдігі ұйымдастырған.