Жасанды интеллект жұмысты жеңілдетеді

Елдегі жолдардың жәй-жапсарын жасанды интеллект арқылы білуге болады. Ұлттық сапа орталығы ойлап тапқан SRDS бағдарламасы трассадағы 8 ақауды анықтайды. Яғни, асфальт жабындысының беріктігі мен ой-шұқыры туралы автоматты түрде ақпарат жинауға мүмкіндік бар. Осыған ұқсас жүйе Америка мен Еуропада кеңінен пайдаланылады. Ал, Орталық Азияда алғаш болып ақылды құрылғыға ие болған Қазақстан ғана. Оның қалай жұмыс істейтінін әріптесім көріп қайтқан болатын. 

Бұрын инженерлер 100 шақырым жолдың сапасына диагностика жасау үшін төрт күн жоғалтатын. Қазір бұл іс төрт сағатта бітеді. Әрине, ақылды құрылғылардың арқасында. Ұлттық сапа орталығы дайындаған арнайы автокөліктер, ақпарат жинап, ортақ базаға тастайды. Сондықтан, жасанды интеллект жұмысты жеңілдетіп қана қоймай, жемқорлықтың да жолын кеседі, - дейді мамандар.

Айналасы бейнекамерағы толы бұл көліктер жолдың кедір-бұдырын бірден сезеді. Ал, жасанды интеллект бірнеше миллисекундта ақаудың көлемі мен координатын шығарады. Құрылғының артықшылығы көп орынды қажет етпейтінінде. Инженерлер кез-келген көлікке жарты сағатта орнататын көрінеді.

Қанат Қалменов, «Жол активтері сапасының ұлттық орталығы» РМК  бас жетекшісі:

– Датчик хода дейді мұны. Бұл жолдың қанша шақырым өткенін көрсетіп тұрады. Ал, бұл датчик жолдың көлденең, тегістігін көрсетеді. Мына камера басты құралы, жоғарыда тұрған. Ол жолда қандай ақаулар бар соны түсіреді. Былайша айтқанда мына жанындағылардың бәрі осы камераның көмекшісі.

Әзірге бұл камераның түсіру көлемі аз. Бір ғана жолақты қамтиды. Бағдарлама іске қосылғанда көлік те жылдамдығын азайтуы керек. Яғни, жүргізушіге артылатын жауапкершілік жоғары.