Жасанды интеллект туралы заң күшіне енді

Енді желі қолданушылары мен жасанды интеллект арқылы контент жасаушыларға бақылау күшейеді. Бүгіннен бастап жасанды интеллект туралы заң күшіне енді. Жаңа нормаға сәйкес, енді әлеуметтік желідегі әрбір өнім қатаң тексеріліп отырмақ. Әсіресе, жасанды интеллект құралын пайдаланып, жалған ақпарат таратуға рұқсат жоқ. Егер ондайға барсаңыз, қомақты айыппұл төлейсіз, тіпті полиция ұстап алып кетуі де ғажап емес. Тек жасанды интеллектіні адамзаттың дамуына пайдасы бар дүниелер үшін қолдануға рұқсат бар. Зұлқарнай Ермұраттың сюжетінде толығырақ.

Жасанды интеллект туралы жаңа заң бас-аяғы 31 баптан тұрады. Жаңа нормада заңдылық пен әділеттіліктен бастап, қауіпсіздік пен қорғаныс қағидаттары аралығындағы мәселелер толық қамтылған. Аталған Заңның 21-бабына сәйкес жасанды интеллект арқылы жасалған немесе өзгертілген материалдарды жариялауға арнайы таңбалау мен ескерту болған жағдайда ғана рұқсат етіледі. Сондай-ақ, заң платформалар мен фактчекерлердің ЖИ-контентті анықтауын жеңілдетеді. Синтетикалық материалдардың тарауын қадағалайды және әлеуметтік желілерде дипфейктерді сүзгіден өткізеді. Талаптарды орындамағандарға жаза қатаң.

Бақберген Шәріпбек, ҚР Жасанды интеллект және цифрлық даму министрлігінің мемлекеттік саясат басқармасының сарапшысы:

- Жеке тұлғаларға — 15, шағын кәсіпкерлік субъектілеріне немесе коммерциялық емес ұйымдарға — 20, орта кәсіпкерлік субъектілеріне — 30, ірі кәсіпкерлік субъектілеріне 100 айлық есептік көрсеткіш мөлшерінде айыппұл көзделген.

Былтыр жасанды интеллектіні дамыту тұжырымдамасы бекітіліп, Президент жанынан арнайы кеңес құрылды. Ұлттық есептеу инфрақұрылымы іске қосылды. Бұл жұмыстар елдің цифрлық әлеуетінің артуына ықпал еткені сөзсіз. Қазірдің өзінде Қазақстан электрондық үкімет даму индексі бойынша 193 елдің ішінде 24-ші орында тұр. Ал, онлайн қызмет бойынша әлемнің ТОП10 елінің қатарында.

Ғиззат Байтұрсынов, ҚР Цифрлық активтер және серпінді технологиялар комитетінің төрағасы:

- Қазіргі таңда мемлекеттік қызметтердің 90 пайыздан астамы онлайн түрде қол жетімді. Стартап экожүйені дамытуды Astana hab атқарады. Бүгінгі таңда Astana hab экожүйесінде 2 мыңнан астам компания жұмыс істейді. Технопарк резиденттері салықтық және виза алуды жеңілдетуге, сондай-ақ инфрақұрылымға қол жеткізуге халықаралық нарыққа шығуға көмек көрсетеді.

Биылғы жыл «Цифрландыру және жасанды интеллект» жылы. Экономиканың барлық саласы сандық форматқа ауысып жатыр. Тіпті, елімізде жасанды интеллектіні оқыту білім беру бағдарламасына да енгізілуде. Мәселен, қазақ тілі мен әдебиеті, шет тілдері, жаратылыстану, тарих пен құқық негіздері және еңбек пен музыка сабақтарында визуализация, 3D графика және аудио-видео контенттерді өңдеу үшін қолданылатын болады. Қазір оқытушылар біліктіліктерін арттырып жатыр.

Айдана Байғажқызы, Информатика пәнінің мұғалімі:

- Биылдан бастап ЖИ элементтері білім беру процесінде енгізіліп келе жатыр. жасанды интеллект курстарынан өткен болатынбыз қызкүйек айынан бастап. ЖИ қарқынды дамып келе жатқан сала болғандықтан бір ай бұрын біз өткен тақырып ол қазір актуалды болмауы да мүмкін. Сондықтан әр білімімізді жаңартып отыруымыз керек.

Бұл жерде мына нәрсені шатастырып алмау керек. Жасанды интеллект жекелеген пән ретінде емес, керісінше қолданыстағы оқу бағдарламаларына кіріктірілген форматта қарастырылған. Жалпыға міндетті білім беру стандарттарына енгізілген өзгерістер 2026 жылғы 1 қыркүйектен бастап күшіне енеді.

Зұлқарнай Ермұратұлы, Әділ Нұржанов.