Жаңа Конституция елдегі саяси құрылымды түбегейлі өзгертеді

Азаматтар референдумда Конституция жобасын қолдайтын болса, еліміздің саяси құрылымы түбегейлі өзгереді. Біз мүлдем жаңа конституциялық үлгіге немесе модельге көшеміз. Мәслихат депутаттары жиналған форумда Президент Қасым-Жомарт Тоқаев осылай деді. Президенттің сөзінше, бұл қадам пропорционалдық және мажоритарлық жүйе арасындағы тепе-теңдікті қамтамасыз етеді. Бұған қоса, сайлау үдерісін барынша жүйелеп, сайлауға түсетін азаматтардың жауапкершілігін арттырады. Ең бастысы – осы өзгерістерге бастау болатын референдумға қатысу. Әрбір азаматтың үні саяси шешім шығару үшін аса маңызды. Ауқымды реформаларды сапалы жүзеге асыру үшін мейлінше тиімді әрі кәсіби заң шығару қызметі жолға қойылып жатқанын да айтты. Ал еліміздегі өкілді билік жүйесінің негізі аймақтарда қалыптаспақ.

Қасым-Жомарт Тоқаев, Қазақстан Республикасының Президенті:

- Ал елдегі саяси науқанның басталуына 3 күн қалды. Күнтізбелік жоспарға сай үгіт-насихат жүргізу науқаны 13-наурызда тоқтайды. Ал 14-і тыныштық күні болады. 12 наурыздан 14-іне дейін учаскелік референдум комиссияларына бюллетеньдер жеткізіліп бітуі тиіс. Онда «Қазақстан Республикасының жаңа Конституциясын қабылдайсыз ба?» деген сұрақ болады. Оған «иә» немесе «жоқ» деген жауап нұсқалары беріледі. Бұл жолғы референдумда 12 млн-нан астам адам таңдау жасауға құқылы. Республика бойынша 10 мың 413 референдум учаскесі жұмыс істейді. Сондай-ақ әлемнің 54 елінде 71 дауыс беру учаскесі қызмет көрсетеді.