Сенат Марракеш шартын қабылдады

Елде көру қабілеті нашар 85 мыңнан аса тұрғын бар. Саны айқын болса да, олардың білім алудағы сапасы қандай? Өзгелермен теңдей әдеби кітап оқып, ғылыми монографиларға қол жеткізе ала ма? Бүгін сенат зағип жандарға қатысты заңды қарады. Марракеш шартын қабылдады. Бұл мүмкіндігі шектеулі азаматтардың кедергісіз оқып-ізденуін қамтамасыз ететін құжат. 

Айгүл Қапбарова, ҚР Парламенті Сенатының Депутаты: 

- Әлемдік деңгейде жарияланған кітаптардың 7%-дан азы ғана Брайль, үлкейтілген қаріп, аудио, сандық және DAISY сияқты қол жетімді форматтарда ұсынылады екен. Біздің елде де бұл бағытта атқарылатын жұмыстар баршылық. 

Елде 7300-ге жуық жеткіншек нашар көреді. Олардың 1200-ден астамы балабақшада, 4800-дейі мектепте және 470 жас колледжде білім алады. Мектеп жасына дейінгі тағы 800-ден аса бала бар. Барлығы 13 арнайы балабақша мен 17 арнайы білім ошағы тіркелген. 

Еділ Оспан, ҚР Оқу-ағарту министрінің орынбасары:  

- Десек те, онымен қоса барлық мектепте көру қабілеті зақымдалған балалармен арнайы сыныптар ашылуға мүмкіндік бар. Қажеттілікке байланысты ондай сыныптар ашылады. Жалпы еліміз бойынша 10 мыңнан аса педагог көру қабілеті зақымдалған балаларға қызмет көрсетумен айналысады.