Туризм тазалықтан басталады
Түркістан облысында мемлекеттік қызметшілер өз мерекесінде сенбілікке шықты. 1 емес 25 мекеменің 500 маманы туристер көп келетін Түлкібас ауданындағы Машат шатқалын шарлады. Саяхатшылардан қалған күл-қоқысты жинады, табиғаты әсем аумаққа апаратын жолдың жан-жағын арамшөптен арылтты.
Сенбілікке 15 дана арнайы техника тартылған. Осылайша, туристік мекеннің тынысы ашылып, келушілерді қабылдауға дайын болды. Тек, тазалықты сақтап, табиғатқа жанашыр болсақ жеткілікті дейді, мамандар.
Марат Жанесен, Түлкібас ауданы әкімінің міндетін уақытша атқарушы:
- Таза Қазақстан акциясы басталғалы бері ауданымызда ұдайы сенбіліктер ұйымдастырылуда. Елді мекендердің ішінде абаттандыру, санитарлық тазалық жүргізіліп келді. Бүгінгі күні 500 адам көлемінде 10 шақырым автомобиль жолының бойындағы өсіп кеткен шөптерді, күл-қоқыстарды тазалау, бұтау, әктеу жұмыстарын жүргізді.
