Суды ысырап еткендер жауапқа тартылады

Қазақстанда суды ысырап еткендер енді жауапқа тартылады. Бұл – Мемлекет басышысы қол қойған жаңа Су кодексінде көрсетілген басты талап. Құжат бес блоктан тұрады. Заңнамада алғаш рет «Су қауіпсіздігі» ұғымы енгізілді. Бұл термин елді су тапшылығы мен су нысандарының ластануы салдарынан қорғауға бағытталған. Бұдан бөлек, су ресурстарын бақылау күшейтіледі. Енді бассейндік инспекциялар ережелердің орындалуын қадағалап қана қоймай, заң бұзушылықтарға жедел әрекет етіп, суды ысырап етудің алдын алуы тиіс. Кодексте су үнемдеу технологияларын енгізу және ресурстарды тиімді пайдалану мәселелері де қамтылған. 

Асқар Әбіров, Инженер-гидротехник: 

– Фермерлік шаруашылықтарға су үнемдеу технологияларына бірден емес, біртіндеп көшуге уақыт беріледі. Бір сәтте жүзеге асыру қиын, қымбат. Бірақ, Су кодексінде бұл мәселеге көңіл бөлінген, кезең-кезеңмен көшу қарастырылған. Әрине, белгілі бір субсидиялар бөлінеді. Сондай-ақ, көлік жуатын орындар – олар да екі жылдың ішінде қайталама су жүйесіне көшуі тиіс. Бұл кодексте көрсетілген жүйелі өзгерістердің бірі.