Шығыс Қазақстан облысында белсенділер марапатталды

Шығыс Қазақстан облысында республика күніне орай салтанатты шара ұйымдастырылды. Мерекелі кеште өңірдің әлеуметтік-экономикалық және мәдени дамуына үлес қосқан қырықтан астам азамат марапатталды.

Спорт ардагері Бақытбек Дуанов бүгін «Құрмет» орденімен наградталған үш азаматтың бірі атанды. Екі жыл бұрын зейнетке шықса да, бұл салада әлі еңбек етіп келеді. 40 жыл бойы жаттықтырушы болып жастарды спортка баулыды, салауатты өмір салтын насихаттады.

Бақытбек Дуанов, спорт ардагері:

– Ең бірінші Президенттің «Құрмет» грамотасын алғанмын, одан кейн «Ерен енбегі үшін» медалін алғанмын. Енді міне, «Құрмет» ордені келіп қалды. Еңбегімізді бағалап жатқанына қуаныштымыз.

Ал марқакөлдік Серік Мухаметқалиевке «Ерен еңбегі үшін» медалі табысталды . Ол 42 жыл бойы мектеп-интернат-колледжінде аға шебер, арнайы пәндер оқытушысы болып еңбек етуде. Білім ошағы ауыл шаруашылық саласына қажетті мамандар даярлайды. 

Серік Мухаметқалиев, оқытушы:

– Негізі ауыл шаруашылығына көп жыл көңіл бөлінбей кетті ғой. Қазір Президент өзі атсалысып жатқаннан кейін сала ары қарай дамиды деп ойлаймын. Қаладағы жастарымыз қайтадан ауылға көшіп барады деп ойлаймын.

Мемлекеттік, ведомстволық наградалар қырықтан астам азаматқа табысталды.  Марапат иелерінің қатарында қарапайым жұмысшылар, білім, денсаулық сақтау, мәдениет, спорт, өндіріс, бизнес тағы басқа салаларының өкілдері, ардагерлер бар. Шара мерекелік концертпен жалғасты.