Салықтан ешкім қашып құтылмайды - Үкімет

Қазақстандық кәсіпкерлер қосылған құн салығынан қашып, компанияларын Қырғызстанға тіркеп жатқаны рас па? Өйткені қазір әлеуметтік желіде осындай ақпарат тараған. Ондағы мақсат - 16 пайыздық қосылған құн салығын төлемеудің амалы деп көрсетілген. Бұл сұрақты бүгін журналистер Мәжіліс кулуарында Қаржы министрі Мәди Тәкиевке де қойды. Оның айтуынша, компания қайда тіркелсе де, егер Қазақстанда жұмыс істеп жатса, онда табыс салығын Қазақстан бюджетіне беруге міндетті. Тек арнайы санаттағылар үшін жеңілдіктер қарастырылған. Ал кәсіпкердің екі жерде тіркелуі — екі елдің де ережесіне бағынуы тиіс деген сөз. Яғни, «бұл кәсіпкердің өзіне тиімсіз», дейді министр. Айта кетейік, 2026 жылдан бастап жаңа салық кодексі күшіне енеді. Оған сәйкес, кірісі 40 млн теңгеден асатын кәсіпкер 16 пайыз мөлшерінде қосылған құн салығын төлеуге міндетті.

Мәди Такиев, ҚР Қаржы министрі:

- Ешқандай көшу жоқ. Меніңше, бұл – ойдан шығарылған уәж. Себебі көптеген нюанс бар. Кейбіреулер «ол жақта салық аз» дейді, бірақ бұл олай емес. Порогтар да, айналымдар да, бизнестің сипаты да бірдей. Оның үстіне, олар басқа елге тіркелгенімен, өмірлік мүдделерінің орталығы Қазақстанда болса, қосымша салықтар туындайды. Сондықтан көшу тиімсіз деп есептеймін.

Сондай-ақ, Қаржы министрлігі мобильдік аударымдар бойынша да тағы бір мәрте ескерту жасады. Өйткені Кірістер комитеті бәрін бақылап отыр. Егер бір адамға үш ай ішінде 100-ден астам адамнан ақша аударылып, оның жалпы көлемі 1 миллион теңгеден асатын болса, онда ол кәсіпкер ретінде танылып, салық төлеуге міндеттеледі. Қаражаттың әрбір тиыны үшін есеп беруі қажет. Егер азамат хабарламаны ескермей, кірісі бойынша түсініктеме бермесе, айыппұл салынады. Мұнда тек туыстар арасындағы ақша аударымдары ғана есепке алынбайды.