Президент ғалымдарды кәсіби мерекемен құттықтады

Ғылым жолы – күрделі жол. Өз ісіне адал, табанды, еңбекқор, жаңашыл әрі жасампаз адамдар ғана ғылым жолындағы қиындыққа төзе алады. Мемлекет басшысы Қасым-Жомарт Тоқаев ғалымдармен кездесуде осылай деді. Президент ғылымның әр саласында табысты еңбек етіп, мемлекетімізді өркендетуге атсалысып жүрген азаматтарға ризашылығын білдіріп, кәсіби мерекемен құттықтады. Салтанатты жиында Тәуелсіздіктің алғашқы жылдарында ғылымға баса мән берілмегені, көптеген ғалымның басқа салаға ауысып кеткені жайында айтылды. Соның салдарынан Қазақстандағы ғылыми қызметкерлердің саны үш есе азайды. Бұл ұлтымыздың зияткерлік әлеуетіне орасан зор кесір тигізді. Бұдан бөлек, Мемлекет басшысы ғылым саласында жемқорлық фактілерінің көбейгенін де тілге тиек етті. Дегенмен бүгінде жағдай оңалды. Ғылым қайтадан төрге шықты. Бұл – мемлекеттің нағыз, адал ғалымдарға сенімі деген сөз. 

Қасым-Жомарт Тоқаев, Қазақстан Республикасының Президенті: 

- Мемлекет ғылымды дамыту үшін нақты шаралар қабылдап жатыр. Мен осыдан үш жыл бұрын Ғылым академиясын жаңғырту туралы тапсырма бердім. Содан бері ауқымды жұмыс жасалуда. Академияға жоғары ғылыми ұйым мәртебесі берілді. Инфрақұрылым жүйесі жаңартылып жатыр. Кадр даярлау ісі жолға қойылды. Былтыр қабылданған «Ғылым және технологиялық саясат туралы» заң осы үрдістерге тың серпін берді. Құжатта ғылымды басқару тәсілдері нақтыланды. 

Ғылым – стратегиялық маңызы бар сала. Сондықтан кейінгі жылдары бұл бағытқа бөлінетін қаржы 3 жарым есе артты. Жас зерттеушілерге қолдау күшейді. Мемлекет басшысының пікірінше, осындай қадамдар еліміздің ғылыми әлеуетін арттыра түседі. Қазір Қазақстанда 25 мыңнан астам ғалым болса, олардың жартысы – 40 жасқа толмаған мамандар. Бұл елімізде ғалымдардың жаңа буыны қалыптасып келе жатқанын көрсетеді. Бұдан бөлек Президент әлемде жасанды интеллект технологиялары қарқынды дамып келе жатқанына тоқталды және Қазақстанның аталған салада алдыңғы қатардан көрінуіне толық мүмкіндігі бар деп санайды. 

Қасым-Жомарт Тоқаев, Қазақстан Республикасының Президенті: 

- Университеттер тың зерттеулер мен жаңалықтардың бастауында тұруға тиіс. Ал еліміздегі білім мекемелері ғылымнан гөрі маман даярлау ісіне көбірек басымдық береді. Бұл оқу орындарының тікелей міндеті болғанымен, білім мен ғылымды қатар алып жүру керек. Қазақстанда зерттеу университеті деген мәртебеге лайық 10 оқу ордасы бар. Ғылымды дамыту үшін бұл жеткіліксіз. Осы жұмысты күшейтуіміз керек.