Планетадағы судың 60%-ы 10 мемлекетке тиесілі. Су жоқ Израиль суды қалай экспорттап отыр? Қазақстан үндеуге қашан көшеді?

«Келесі ғасырдағы соғыстар мұнай үшін емес, су үшін болады». Дүниежүзілік банкінің бұрынғы вице-президенті Исмаил Серрагельдиннің бұл сөзі 90-шы жылдар соңы мен 2000-шы жылдардың басында кең тарады. Осы цитата кейін медиа мен сарапшылар арасында «Су - XXI ғасырдың ең құнды ресурсы» деген қысқаша нұсқаға айналды. 21 ғасырдың алғашқы ширегі енді аяқталып жатыр. Әзірге ең құнды ресурс - қазба байлықтар мен жаңа технологиялар. Дегенмен су тапшылығы проблемасының ушыға түсетін уақыты әлі алда. Адамзат жыл сайын шамамен 4 триллион текше метр су тұтынады. Бірақ оның үлесі әділ бөлінбейді. Су қоры мол елдерде өзендер еркін ағып жатса, Африка мен Орталық Азияның кейбір өңірлерінде әр тамшы су қымбат. Статистикаға сүйенсек, тұщы судың 8 пайызы – адамдардың ішуіне, 60 пайызы – ауыл шаруашылығына, 30 пайызы – өнеркәсіптік өндіріс пен энергетикаға жұмсалады. Бір қарапайым ғана жеңіл автокөлікті шығару үшін 80 мың - 150 мыңнан жоғары литр су, ал бір баррель мұнай өндіруге 2 мың - 7 мың литр аралығында су кетеді. Сондықтан бүгінде су - жай табиғи ресурс емес, геосаяси және экономикалық құндылық.