Париж Олимпиадасының соңғы күндері

Бүгінгі Олимпиада күнін таеквондошы Батырхан Төлеуғали сәтті  бастады. Іріктеу кезеңінің  алғашқы айналымында Батырхан Малиден келген Исмаил Кулибалиді жеңді. Ал ширек финалға берілер жолдаманы екі дүркін әлем чемпионы, италиялық Симоне Алессиомен сарапқа салды. Тартысты жекпе-жекте тәжірибелі италиялық спортшы 2:0 есебімен айласын асырып кетті.

Айта кетейік, он сегіз жасар Батырхан Төлеуғали Олимпиадаға бірінші рет қатысып отыр. Егер италиялық спортшы финалға өтіп жатса, біздің таэквондошымыз жұбаныш раундына қатысып, қола медаль үшін күресуге мүмкіндік алады. Ал еркін күрестен 125 келі салмақта белдесетін спортшымыз Жүсіп Батырмырзаев алғашқы белдесуде польшалық Роберт Бараннан 4:1 есебімен жеңіліп қалды. Роберт Еуропа чемпионатының 2 дүркін күміс және қола жүлдегері. Ескек есудан В финалында сынға түскен Қазақстан құрамасы мәреге үшінші боп жетті. В тобында бәсекелескен Мария Бровкова мен Руфина Искакова 1.57 секунд уақыт көрсеткішімен келіп, жалпы есепте 11 орынға жайғасты.

Ал бүгін кешке жеңіл атлетикадан қазақстандық Дейзи Джепкемей финалда бақ сынайды. 10 мың метрге жүгіретін желаяғымызға сәттілік тілейік.