Орталық Азия мемлекеттері басшыларының VI консультативтік кездесуі өтті
Қазақстан Орталық Азия Іскерлік кеңесін құру ұсынысын қолдайды. Бүгін елордада өткен Орталық Азия мемлекеттері басшыларының VI Консультативтік кездесуінде Қасым-Жомарт Тоқаев осылай деді. Сонымен қатар Президент аймақтың көлік жүйесін дамыту жөніндегі кешенді стратегияны қабылдаудың маңыздылығына тоқталды. Бұдан бөлек, жиында Орталық Азия елдеріне арналған Су-энергетика консорциумын құру және гидроэнергетикалық нысандарды бірлесе салу бастамасы көтерілді.
Астанада тағы ауқымды саяси шара. Бұл жолы Орталық Азия мемлекеттерінің басшылары бас қосты. VI Консультативтік кездесу Қазақстанның төрағалығымен өтті. Алғаш алты жыл бұрын астанадан бастау алған еді. Ұлы Жібек жолы бойындағы елдердің мақсат-мүддесі бір. Бастысы – аймақта тұрақтылық пен қауіпсіздікті сақтау. Сауда-экономикалық байланысты дамыту. Мәдени-гуманитарлық ынтымақтастық та елдер арасындағы достықтың темірқазығы.
Қасым-Жомарт Тоқаев, Қазақстан Республикасының Президенті:
– Орталық Азия қашанда бірегей өркениеттер тоғысқан аймақ болған. Оның жалпы әлемдік прогресте атқаратын рөлі зор. Бүгінде ортақ тарихымыз бен халықтарымыздың дүниетанымының ұқсастығына арқа сүйеп, Орталық Азияның жаңа келбетін қалыптастырамыз. Оны келешекке ұмтылатын әрі мол мүмкіндіктер мекені ретінде танытамыз. Бұл саммит осы жолдағы маңызды белеске айналатынына сенімдімін.
Қазақстан ұйымның әрі аймақтың абыройын арттыруға айтарлықтай үлес қосып келеді. Мәселен, биыл төрағалығы аясында қауіпсіздік пен экономикалық серіктестікті нығайтуға, қоғамдағы әйелдердің рөлін күшейтуге, сараптамалық тұрғыдан ықпалдастықты кеңейтуге бірлескен іс-шара ұйымдастырды.
