Мереке қарсаңындағы қайырымдылық шарасы

Республика күні қарсаңында Астанадағы аз қамтылған отбасыларға азық-түлік  таратылды. Бүгін Астана әкімдігі мен еріктілерден құралған топ тұрмыстық керек-жарақты мұқтаж жанұяларға жеткізіп берді. Бұл қайырымдылық шарасы еліміздегі ең ірі жанармай станциялар желісі Qazaq Oil-мен бірге осымен сегізінші рет ұйымдастырылып отыр.

Азық-түлік қораптарын арқалаған топ Астанадағы аз қамтылған отбасылардың үйін аралуға шықты. Алғашқы аялдама алтын алқа иегері, сегіз баланың анасы Гүлшат Ерімбетованың шаңырағы.

Гүлшат Ерімбетова, Астана қаласының тұрғыны:

– Жолдасым жұмыс істейді. Мен осы бала-шағамен үйде отырамын. Бес балам мектепте оқиды, бір балам мини-центрге барады. Алтын алқа иегерімін. Осылай елеп-ескеріп, құттықтап жатқандарыңызға рахмет.

Үш баламен үйде отырған ана тосын сыйға ырза болып қалды.  Осындай азық-түлік, керек-жарақ  толы жиынтық қаладағы мыңға жуық отбасына табысталды. Қайырымдылық шарасы бес бірдей ауданды қамтыды.

Қуаныш Молдабек, Астана қаласы әкімінің кеңесшісі:

– Осымен 2023 жылдан бері Qazaq Oil компаниясымен бірге басталған сегізінші акция.  Және де осы сәтті пайдалана отырып, меценаттарды, әлеуметтік жауапты бизнес өкілдерін осындай қайырымдылық акциясына қатысуға шақырамыз. Бүкіл Қазақ елін Республика күнімен құттықтағым келеді.

Қала әкімдігі мұндай бастамаларды әр мерекеде ұйымдастыруға тырысады. Өйткені әлеуметтік аз қамтылған отбасыларға қолдау көрсету – қоғамдағы ауызбіршіліктің нышаны.