Мемлекет басшысы жаңа Конституцияның басты авторы – Айбек Дәдебай

Жаңа Конституцияны қабылдау бойынша референдумда құқықтық рәсімдердің сақталуы, заң талаптарының қатаң орындалуы өзекті. Арнамызға берген эксклюзив сұхбатында Қазақстан Республикасы Президенті Әкімшілігінің Басшысы Айбек Дәдебай осылай деді. Ол референдумды өткізуге дайындық жұмыстары қарқынды жүріп жатқанын атап өтті. Бұл ретте Орталық референдум комиссиясының атқарар рөлі ерекше болмақ. Ал мемлекеттік органдардың басты міндеті - дауыс беру үшін қажетті инфрақұрылыммен қамтамасыз ету, сайлау учаскелерінің жұмысын ұйымдастыру, оның ішінде мүмкіндігі шектеулі азаматтарға қажетті жағдайды жасау», - деді Айбек Дәдебай.

Айбек Дәдебай, Қазақстан Республикасы Президенті әкімшілігінің басшысы:

- Референдумға жалпы дайындық жұмыстары өте қарқынды жүріп жатыр деуге болады. Бұл референдумның еліміз үшін де, барлық азаматтарымыз үшін де маңызы өте зор. Сондықтан барлық құқықтық рәсімінің сақталуы, заң талаптарының қатаң орындалуы өте өзекті болып тұр. Бұл ретте Орталық референдум комиссиясының атқарар рөлі ерекше болмақ. Ал мемлекеттік органдардың басты міндеті – дауыс беру үшін қажетті инфрақұрылыммен қамтамасыз ету, сайлау учаскелерінің жұмысын ұйымдастыру, оның ішінде мүмкіндігі шектеулі азаматтарға қажетті жағдайды жасау болып табылады.

Сондай-ақ, Айбек Дәдебай Мемлекет басшысы жаңа Конституция жобасының мәтініне аса мән бергенін айтты. Ол Президент соңғы жарты жыл ішінде аптасына кемінде бір рет, кейде одан да жиі Парламенттік реформа бойынша жұмыс тобының өкілдерімен, жектекшілерімен, одан кейін Конституциялық комиссияның жетекшілерімен кездесіп отырғанын атап өтті.

Айбек Дәдебай, Қазақстан Республикасы Президенті әкімшілігінің басшысы:

- Мемлекет басшысы жаңа Конституция жобасының мәтінімен жұмысқа баса мән берді. Ол үшін арнайы уақыт бөліп, барынша белсенді атсалысты. Азаматтардан, сарапшылық қауымдастықтан, қоғамдық ұйымдардан келіп түскен сындарлы ұсыныстарды жеке өзі оқып, жіті зерделеді. Президентіміз осы мәтінмен жеке өзі жұмыс істегенін Президент әкімшілігінің жауапты қызметкерлері жақсы біледі. Жалпы жаңа Конституция жобасының мәтінінде Мемлекет басшысының саяси бағдарының басты қағидаттары, қоғам мен мемлекеттің дамуына қатысты көзқарасы, сондай-ақ ұстанымдары кеңінен көрініс тапқан. Сол себепті, сөзсіз, Қасым-Жомарт Кемелұлы жаңа Конституциямыздың басты авторы болып табылады.