Президент Пәкістанның The News International газетіне сұхбат берді

Мемлекет басшысы Қасым-Жомарт Тоқаев Пәкістанның The News International газетіне сұхбат берді. Президент екі ел арасындағы қарым-қатынас, өңіраралық байланыс, бейбітшілік кеңесін құру сынды халықаралық саяси тақырыптарға қатысты пікір білдірді. Сондай-ақ, Қазақстан Пәкістанды халықаралық қоғамдастықта беделі биік стратегиялық серіктес ретінде қарастыратынына тоқталды. Қос ел 1992 жылы дипломатиялық қатынас орнаған сәттен бері бірқатар мәселе мен жобалар бойынша табысты әрекет етіп келеді. Президент бұл жолғы келіссөздер мен уағдаластық – арадағы байланысты бекіте түсетініне сенім білдірді.

Қасым-Жомарт Тоқаев, Қазақстан Республикасының Президенті:

- Пәкістанға алғашқы мемлекеттік сапарым серіктестік көкжиегін кеңейтіп, өзара байланыс тарихының жаңа кезеңіне бастау болады. Сапар барысында қол қойылған 60-тан астам үкіметаралық және іскерлік келісім екіжақты ынтымақтастыққа зор серпін берері сөзсіз. Көлік-логистика, ауыл шаруашылығы, өнеркәсіп пен өндіріс, денсаулық сақтау, білім беру және басқа да секторлар экономикалық ынтымақтастығымыздың басым бағыттары саналады. Мен екі елдің компаниялары бірлескен кәсіпорындар құрып, тиімді жобаларды жүзеге асыра алады деп ойлаймын. Оған мүмкіндік мол.

Сұхбат барысында Мемлекет басшысы елде жүргізіліп жатқан ауқымды Конституциялық реформаны да тілге тиек етті. Жасалып жатқан барлық басталамар елді жаңғыртуға, шын мәнінде Әділетті Қазақстанның негізін қалауға бағытталғанын айтты. Қазақстан «суперпрезиденттік» модельден бас тартып, тежемелік әрі тепе-теңдік жүйесі тиімді жұмыс істейтін президенттік республика үлгісіне өткенін жеткізді. Ол үшін ең алдымен, «Күшті Президент – ықпалды Парламент – есеп беретін Үкімет» тұжырымдамасына арқа сүйейтініне тоқталды.

Қасым-Жомарт Тоқаев, Қазақстан Республикасының Президенті:

- Қазір біз саяси жаңғырудың мүлдем жаңа кезеңіне қадам бастық. Конституциялық реформа аясындағы ең басты өзгерістердің қатарында бір палаталы парламентке (Құрылтай) өту, Халық Кеңесін құру және Вице-президент лауазымын енгізу секілді бастамалар бар. Адам құқықтары мен бостандықтары мемлекеттің негізгі басымдығы ретінде жарияланады. Ал ынтымақ пен бірлік, этносаралық және конфессияаралық келісім секілді құндылықтар мемлекеттігіміздің мызғымас тұғыры болып қала береді.