Мемлекет басшысы Финляндия Президентімен телефон арқылы сөйлесті

Президент Қасым-Жомарт Тоқаев Финляндия Республикасының Президенті Александр Стуббпен телефон арқылы сөйлесті. Әңгімеге Фин тарапы бастамашы болды. Мемлекеттер басшылары екіжақты ынтымақтастықтың қазіргі жай-күйін талқылады. Сауда-экономикалық және мәдени-гуманитарлық байланыстарды одан әрі нығайтуға қос тараптың да бейіл екенін растады. Екі ел арасындағы қарым-қатынасқа тың серпін беру үшін Финляндия Президенті биыл қазан айында Қазақстанға сапармен келуге дайын екенін жеткізді. Тараптар орнықты дамуды қамтамасыз ету, жаһандық бейбітшілік пен қауіпсіздікті ілгерілету мақсатында көпжақты ұйымдар аясындағы күш-жігерді үйлестірудің маңызын атап өтті.