МӘМС жүйесіндегі қаржыны бақылау күшейтілді

Мемлекет басшысы Денсаулық сақтау министрі Ақмарал Әлназарованы қабылдады. Бас дәрігер Президентке алдымен негізгі медициналық-демографиялық көрсеткіштер туралы баяндады. Сөзіне қарағанда, елде нәрестелер өлімі 15,3 пайызға төмендеп, медициналық көмектің қолжетімділігі артқан. Онкологиялық қызметті дамыту шаралары жалғасуда. Мәселен, Астана қаласында жаңа онкологиялық кешеннің базасында Протонды терапия орталығы ашылған. Қызылорда мен Ақтауда 2 жаңа орталық іске қосылыпты. МӘМС жүйесіндегі қаржыны бақылау күшейтіліп, мониторинг жүйесі автоматтандырылыпты. Жеке-жеке қызмет көрсететін ақпарат жүйелерін E-Densaulyq платформасына біріктіру қолға алынған. Соңғы екі жылда фармацевтика өнеркәсібіне салынған инвестиция көлемі 2,3 есе, ал дәрі-дәрмектің экспорты 1,9 есе өскен.  Препараттың 400-ден астам түрін өндіру бойынша 6 инвестициялық келісім жасалыпты. Олардың жалпы құны 316,3 миллиард теңгеге бағаланған. Өз кезегінде Президент медициналық қызмет сапасын арттырып, саладағы қаржылық тәртіпті қатаңдату және маман даярлау жүйесін жетілдіріп, цифрлық жаңғырту жұмыстарын жеделдету және отандық фармацевтика өнеркәсібін өркендету бойынша бірқатар тапсырма берді.