Вице-Президент Мемлекет басшысына бағынады

Қазақстанда Вице-Президент лауазымы пайда болады. Ал мемлекеттік кеңесші лауазымы қысқарады. Сондай-ақ, конститициялық комиссия құрылады. Оның құрамына кімдер кіреді? Міндеті мен мақсаты қандай? Қызылордада өткен Ұлттық құрылтай отырысынан Асылбек Тойбек тарқатады.

Президент ел ішінде жиі талқыланып жүрген әңгімеге нүкте қойды. Енді мемлекеттік басқару жүйесінде вице- президент деген лауазым пайда болады. Ол тікелей мемлекет басшысына бағынады. Өйткені өкілеттігін Президент өзі белгілейді. Әрі оның тапсырмасы бойынша халықаралық форумдарда және шет мемлекеттер делегацияларымен келіссөздерде Қазақстанның мүддесін білдіреді.

Айта кетейін, Мемлекеттік кеңесшінің мәртебесі мен өкілеттіктері туралы Жарлыққа Президент 2022 жылғы маусымда қол қойған еді. Ал, сарапшылар Билік институттарының жаңа құрылымы әділетті қоғам құрудың негізі болады дейді.

Ел өміріндегі тағы бір елеулі жаңалық - Конституция қайта жазылады. Қолданыстағы Ата Заң мәтінінде терминологиялық, стильдік кемшіліктер болған. Жаңа Конституцияны жазуға білікті тіл мамандары тартылады. Бірақ Президент басты құжат қанша заман өтсе де өзгеріссіз қала беретіндей сапалы жазылуы керек деді. Одан бөлек елде Конституциялық комиссия құрылады.

Қасым-Жомарт Тоқаев, Қазақстан Республикасының Президенті:

- Арнайы Жарлыққа ертең қол қоямын. Комиссия құрамына 100-ден астам азамат кіреді. Оның ішінде Ұлттық құрылтай мүшелері, белгілі заңгерлер, ақпарат құралдары басшылары, аймақтық мәслихат төрағалары мен қоғамдық кеңес өкілдері және басқа да білікті мамандар болады. Бұл жұмысқа Конституциялық соттың төрағасы жетекшілік етеді.

Комиссия барлық ұсынысты сараптап, қорытып, нақты өзгерістердің жобасын әзірлейді. Содан соң жалпыхалықтық референдум өтетін уақыт белгіленеді. Президент ең бастысы Ата заңда қазақ жеріндегі өркениет пен мемлекеттіліктің тарихы терең екені нақты көрініс табуы тиіс деді.