Кассациялық сотқа 5 мыңға жуық арыз түскен

Бүгін Президент Жоғарғы Сот төрағасы Асламбек Мерғалиевті қабылдады. Биылғы 7 айдағы сот жүйесі қызметінің қорытындысына қарағанда, азаматтық істер бойынша дауларды шешудің баламалы әдістерін қолдану 24 пайызға, яғни 61 мыңнан 76 мыңға дейін өсіпті. Олардың қатарында медиация, бітімге келу мен татуластыру рәсімдері бар. Азаматтардың мемлекеттік органдармен арадағы даулары бойынша 2,6 мың акт заңсыз деп танылған. Тергеу соттарының қамауға алуды санкциялаудан бас тарту үлесі 37 пайызға дейін өскен. Сондай-ақ, енді бірінші шілдеден бастап дербес кассациялық сот жұмыс істей бастаған. Содан бері 5 мыңға жуық арыз-шағым түсіп үлгерген. Президент Жоғарғы сот төрағасына халықтың сот жүйесіне сенімін нығайту және сот төрелігінің сапасын арттыру жұмыстарын жалғастыруды тапсырды.