Қарызы жоқ қоғам

«Қарызсыз қоғам» жобасының форматы өзгерді. Енді мамандар несие тарихында проблемасы бар, банктен алғанын қарызын өтей алмай жүрген борышкерлерді көпшілік ортадан іздейді. Мәселен, бүгін «Аманат» партиясының Астана қалалық филиалының ұйымдастыруымен орталық базарда көшпелі жиын өтті. Сауда жасауға келген жұрт жаппай мамандарға мәселесін айтып, тегін кеңес алды.  

Үстел басында заңгерлерден бастап, сот орындаушыларына дейін отыр. Бәрінің басын қосқан «Аманат» партиясының өкілдері. Мақсат - мойынынан қыруар қарыз арқалап, сүрінуге шақ жүрген жандарға кеңес беріп, көмек көрсету. Бұған дейін «Астаналық» базарда дәл осындай шара өткен. Оған 100-ден аса азамат қатысқан еді. Бүгінгі кеңеске де келгендердің қарасы қалың.  

Мұхаммед Болысбек, «Amanat» партиясы Астана қалалық филиалының атқарушы хатшысы: 

- Аманат партиясының жанында қоғамдық қабылдау бар. Белсенді жұмыс істейді. Сол жерге өзекті, өткір мәселесін айтып келген азаматтар жүгіне алады. Астана қаласы бойынша бізде мына Тәуелсіздік үште орналасқан. Бірақ, сол қоғамдық қабылдауды осылай адам көп шоғырланған жерге алып шығуды дәстүрге айналдырып отырмыз. 

«Қарызсыз қоғам» жобасының басы-қасында жүргендер берешегі 90 күннен асып, қара тізімге кірген бір миллионнан аса адамға көмек көрсетпек. Аманат партиясының бастамасымен жүзеге асқан бағдарлама ел аумағында ерекше сұранысқа да ие. Былтыр 850 мыңға жуық тұрғын қаржылық сауатын арттырыпты. Жобаға қатысқандардың 40%-і қарыз жүктемесі мен несиелер санын азайтқан. 

Дулат Мыңбаев, Қаржылық сарапшы: 

- Кейбір азаматтар қанша қарызы бар екенін де білмейді, қай банктен алғанын да ұмытып қалған жағдайлар да болады. Кейде адамдар бар шоттары жабық болғандықтан жұмысқа да тұра алмайды. 

Жоба жетекшілері несиелік борышы 5 жылдан асқан жандарға банкроттық жариялауға көмектеседі. Қатысуға ниет білдіргендер сенім телефондарына хабарласа алады. Оған қоса, курсқа қатыспай, заңгер көмегіне жүгінуге де болады. Бастысы қарызға батып, қиын жағдайда қалған азаматтардың жұмысқа орналасуына да мүмкіндік жасалмақ.