«Ет неге қымбат? Өйткені ауылда делдалдар қаптап жүр» – Ринат Зайытов

Қазір еттің бағасын қоятын солар болып кеткен. Депутат Ринат Зайытов бүгін Мәжіліске қаздай тізіліп, бюджетті бекітіп алуға келген Үкімет өкілдеріне сауда төңірегіндегі біраз былықтың барын айтты. Мәжілісмен базардағы ет бағасының өсуінен ауылдағы малшылар рахат көріп жатқан жоқ дейді. Керісінше, ұтылып жатыр. Өйткені сойылған малды ыстықтай жіліктеп, ауылға келіп тұрып алып кетіп жатқан әккі алып-сатарлар. Құнын да құныққандар дұрыс төлемейді. Қаладағы бағадан екі есе аз ұсынады. Экспортқа да малдың терісі мен жүнін шығара алмай, шаруалардың басы қатып отыр. «Бұл тұрғыда делдалдармен күресті қалай жүргізбексіз?» — деп Сауда министріне сұрақты төтесінен қойды.