Енді зейнетақы жинағыңызды көз емдеуге пайдалана алмайсыз

Енді қазақстандықтар көзін емдету үшін зейнетақы жинағын ала алмайды. Бұл туралы «Отбасы банк» хабарлады. Қазіргі уақытта банк қарауында «офтальмология» бағыты бойынша жалпы сомасы 13 млрд теңгеден асатын 15 800 өтінім жатыр екен. Ол өтінімдер бұрынғы тәртіппен қаралады. Естеріңізге салайық, 2 ай бұрын зейнетақы қаржысын тіс емдеу үшін жұмсауға да шектеу қойылған. Содан кейін офтальмологияға сұраныс 7 есе артып кетіпті. Банк тексеріс барысында күмәнді жағдайларды анықтаған. Әртүрлі клиенттер бір клиникамен келісім-шарт жасағанымен, құжаттарда емхананың мекен-жайы әр қалада әртүрлі көрсетілген. Тексеру кезінде бұл мекен-жайларда ондай клиника мүлде жоқ болып шыққан. Айта кетейік, жыл басынан бері Зейнетақы қорынан баспана үшін 531 млрд, ал емделуге 377 млрд теңге алынған. Қазір зейнетақы активінің көлемі 25 трлн 198 млрд теңгеге жуықтаған. Ал, келесі жылдан бастап зейнетақы жарналарын төлеу тәртібі өзгермек. Енді зейнетақы жарналарын төлемегендердің банк шоттары бұғатталады. Бұған қоса, жинақты пайдалану мүмкіндігі кеңейтілгелі жатыр. Заң жобасы мақұлданса, азаматтар қордағы қаржысын ипотека жабу үшін пайдалана алады.