Елімізде 1500 адам гемофилияға шалдыққан

Бүгін – Дүниежүзілік гемофилия күні. Бұл дертке шалдыққан жандар үшін тұрақты бақылау мен үздіксіз емдеу аса маңызды. Елімізде гемофилия диагнозы қойылған науқастар саны 1 500-ден асады, олардың үштен бірі - балалар. Осы датаға орай Алматыда арнайы баспасөз мәслихаты өтті. Жиында мамандар дертті емдеудің заманауи тың тәсілдері мен науқастардың өмір сапасын жақсарту жолдарын талқылады. 

Гемофилия – үкім емес. Уақтылы ем мен тұрақты бақылау науқастарға қалыпты өмір сүруге мүмкіндік береді. Дүниежүзілік гемофилия күні қоғам назарын осы дертке аударып, науқастарға қолдау көрсетуге арналған. 

Ұлжалғас Өскенбаева, Алматы қаласы бас штаттан тыс балалар гематологы: 

- Әдетте ауру ерте балалық шақта анықталады. Геморрагиялық синдром кезінде дәрігерлер буын ішіне қан құйылу мен қан кетулерге ерекше назар аударуы керек. Бұл белгілер алғашқы көмек көрсету кезінде маңызды рөл атқарады. Қан кетулер көбінесе жарақаттан кейін бір-екі сағаттан соң пайда болады, яғни бастапқыда байқалмайды. Сондықтан әр науқасқа басынан бастап дұрыс емдеу жоспарын жасап, оның нәтижесін үнемі бақылап отыру өте маңызды. 

Қазақстанда гемофилиямен ауыратын науқастар қажетті дәрілік заттармен мемлекет тарапынан қамтамасыз етіледі. Бұл препараттар гемофилияның ауыр түрлерінде өмірді сақтап қалуға мүмкіндік береді.  

Михаил Владимиров, «Такеда Қазақстан» ЖШС директоры: 

- Гемофилиямен ауыратын науқастар дәрімен қамтылып жатыр. Біз оларға заманауи, тиімді ем ұсыну үшін барымызды салудамыз. Қазір қазақстандық науқастар «Такеда» препараттарын қабылдап жүр, оның ішінде сирек кездесетін дертке шалдыққандар да, гемофилиямен ауыратындар да бар. Сонымен бірге дәрігерлерді оқыту, цифрлық құралдарды енгізу және науқастардың өмір сапасын жақсартуға арналған жобалар арқылы жан-жақты қолдау көрсетіледі. 

Сарапшылар медицина саласындағы қазіргі жетістіктер арқасында гемофилиямен күресу деңгейі айтарлықтай жақсарған деп отыр. Заманауи терапия науқастардың өмірін ұзартуға мүмкіндік береді. Ауыр дертке ұшыраған жандардың да 75-77 жасқа дейін өмір сүру мүмкіндігі бар.