Болат пен темір өндірісі артты

«Qarmet» кәсіпорындарында 2 жылда болат өндірісі 22 пайызға, көмір концентраты 26, темір кені 32 пайызға артқан. Өнім түрлері 260-тан 350-ге дейін ұлғайған. Ол туралы «Qarmet» АҚ директорлар кеңесінің төрағасы Андрей Лаврентьев Президенттің қабылдауында айтты. Қазіргі таңда 9 ірі инвестициялық жобадан тұратын кешенді бағдарлама жүзеге асырылып жатыр. Бұл бастама елдегі болат өндірісін дамытып, металл прокатының импортын төмендетуді көздейді. Бұдан бөлек, атом электр станциясының құрылысына арналған өнім шығарылады. Qarmet жанынан ірі металлургиялық кластер құрылып, шағын және орта кәсіпорындардың шикізатын терең өңдеуге мүмкіндік берілмек. Сондай-ақ, отандық машина жасайтын зауыттар Теміртаудың болатын пайдалануға ниетті. Президент кәсіпорынды жан-жақты жаңғырту, әлеуметтік мәселелерді шешу, экологиялық жағдайды жақсарту, машина жасау өндірісін жандандыру шараларын жалғастырудың маңызына тоқталды.