Астанада 5 экопарк салынады

Астана маңында қатарынан 5 экопарк салынады. Әрі жасыл желек аумағы кеңейтіліп, тұрғын басына шаққанда 19 шаршы метрге дейін жеткізіледі. Бүгін бас қаланың жоспары таныстырылған жиында осындай ақпарат айтылды. Астана урбанистика орталығының хабарлауынша, мұның бәрі 2035 жылға дейінгі бас жоспарға енгізілген. Онда шаһар маңындағы экологиялық инфрақұрылымды дамытуға басымдық беріледі. Сондықтан қала сыртындағы экопарктер санын көбейту көзделіп отыр. Жаңа құжатта жалпы саны 130-дан асатын жоба бар. Оның ішінде логистикалық, өнеркәсіптік нысандармен қоса, әлеуметтік объектілер мен су және газбен қамту жобалары да бар.

Данияр Шыңдалиев, Астана урбанистика орталығы директорының орынбасары:

- Біз экопарктерді дамытуға басымдық беріп отырмыз. Қаланың өз ішінде де экопарктер бар. Мәселен, Талдыкөл көлдер жүйесі. Бұл аумақ та алдағы уақытта дамытылады. Биыл Кіші Талдыкөлдің бесінші учаскесін игеру басталады. Негізгі мақсат - табиғи қалпын сақтай отырып, аумақты ішінара абаттандыру. Біз ландшафтқа ұқыпты түрде кірігіп, тыныш демалыс аймақтарын қалыптастырғымыз келеді. Сонымен қатар, экопарктер Астана айналасында да салынатын болады, бұл бағытта жоспарлар бар, қазір қарастырылып жатыр.