2025 жыл – жұмысшы мамандықтарының жылы болып жарияланды

Бұдан былай кәсібіне адал, қарапайым еңбек адамдарының мәртебесін көтеруге басымдық беріледі. Осы үшін Мемлекет басшысы келер жылды Жұмысшы мамандықтардың жылы деп жариялады. Бұл үшін техникалық және кәсіби білім беру жүйесін реформалау қажет. Сондай-ақ, жұмысшы мамандықтарының мәртебесін асыру мақсатында қоғамда еңбекқор және нағыз маман болу идеясын насихаттау маңызды. Себебі, әркім жауапкершілікті терең сезініп, өз міндетін сапалы атқарса, еліміз дамудың сара жолына түседі, – деді Президент. Мемлекет ұсынып отырған «Адал азамат – Адал еңбек – Адал табыс» қағидаты да осыны көздейді.

Қасым-Жомарт Тоқаев, Қазақстан Республикасының Президенті:

– Халқымызда «Жұмыстың көзін тапқан – байлықтың өзін табады» деген сөз бар. Кәсібіне адал әрі жауапкершілікпен қараған адам қашан да лайықты бағасын алады. Бұл түсінікті қоғам санасына сіңіру қажет. Азаматтарға құрметті атақ берудегі түпкі мақсатымыз да – осы. Бұған дейін мұғалімдерге, дәрігерлерге және мәдениет қайраткерлеріне осындай атақтар беріле бастады. Бұл – өте жақсы бастама, оның аясын кеңейту керек.