Татарстандықтар Көшпенділер ойындарының ашылу салтанатын тікелей эфирде тамашалады

Астанада Дүниежүзілік көшпенділер ойындарына Татарстаннан 50-ге жуық адам қатысып жатыр. Күрес, кореш, қазақша күрес, аударыспақ сияқты ұлттық спорт түрлерінен бақ сынауда. Жалпы Татарстан 2016 жылдан бастап Дүниежүзілік көшпенділер ойындарына қатысып келеді. Сол кезден бастап татар спортшылары 5 медаль жеңіп алған. Ал қазақ жерінде өтетін бәсеке жүзден жүйрікті анықтап, әділ өтетініне сеніміміз мол дейді бауырлас халық. Төрткүл дүниенің назарын аударған  Дүниежүзілік көшпенділер ойындарының ашылу салтанатын тағатсыздана күткен Шейхутдиновтер отбасы Қазақстанға барғысы келген, өйткені балалары Дүниежүзілік ойындарына төреші болып бекітіліпті. Одан бөлек, қазақ жерінде өтетін байрақты бәсеке Татарстан халқының тарапынан қызығушық  тудырғанын айтады. Ойынның ашылуын тамашалаған отбасы енді спорт жарысын үзбей көреміз деп отыр.

Фаннур Шейхутдинов, Қазан қаласының тұрғыны:

– Дүниежүзілік көшпенділер ойындарының ашылуы өте жоғары деңгейде, қызық өтті. Әсіресе қатысушы мемлекеттердің көптігі қуантады. Осыдан бес-алты жыл бұрын әкеміз де Көшпенділер ойындарына қатысқан. Содан бері үзбей көреміз. Бірақ бұл жолғы Қазақстанның ұйымдастыруы өте керемет болды. Таңғалдық.