Жаңа Ата заң қабылданды

Қазақстанның жаңа Ата Заңы қабылданды. Бүгін Мемлекет басшысы ұлттың келешек тағдырына тікелей әсер ететін тарихи құжатқа ресми түрде қол қойды. Ақордадағы алқалы жиынға барып келген әріптесім Зұлқарнай Ермұратұлының материалын көрейік.

Ақүйдегі атмосфера ерекше бүгін. Себебі, жазушы – хәкім, депутат – әкім, бәрі осында. Алдымен Құрмет қарауылы Қазақстан Республикасының жаңа Конституциясын салтанатты түрде ортаға алып шықты.

Кейін, мемлекеттік гимннен соң республикалық референдумның қорытындысы жарияланды. Комиссия төрағасы Нұрлан Әбдіров саяси науқанның салмағын саралады.

Нұрлан Әбдіров, Орталық референдум комиссиясының төрағасы:

- Еліміздің барлық өңірінде және шет елдердегі учаскелерде дауыс беруге қатысқан азаматтардың 7 млн 954 мың 667-сі немесе 87,15 пайызы жаңа Конституцияны қабылдауды қолдады.

Бұл — Халық конституциясы. Жаңа Ата Заң кіріспеден, 11 бөлімнен және 95 баптан тұрады. Тарихи сәт. Мемлекет басшысы Ата заң мен Конституцияны іске асыру жөніндегі шаралар туралы Жарлыққа қол қойды.

Артынша Президент сөз алып, бұл – елдің ертең үшін жасалған қадам екенін айтты. Сондай-ақ, тарихтағы аса маңызды, мән-мағынасы айрықша оқиғаның өтуімен құттықтады.

Қасым-Жомарт Тоқаев, Қазақстан Республикасының Президенті:

- Енді Халық Конституциясы 1 шілдеден бастап ресми түрде өз күшіне енеді. Ал Конституция күнін мемлекеттік мереке ретінде ұлттық деңгейде жыл сайын 15 наурызда атап өтетін болдық. Еліміздің барша халқына Ата заңымыз құтты болсын дегім келеді!

Иә, жаңа Ата Заңның жобасын жасауға бүкіл ел атсалысты. Хан да, қара да ұсыныс айтты. 130 мүшеден тұратын комиссия бірнеше апта жұмыс істеп, мәтінін дайындады.

Бақыт Нұрмұханов, ҚР Конституциялық соты төрағасының орынбасары:

- Бұл конституция ел тарихында жаңа бір парақты ашып отыр. Ендігі жұмыс біз қолданыстағы заңнаманы оған сәйкес келтіріп, конституцияның ережелері нағыз күнделікті өмірде көрініс табарына біз кәміл сенеміз.

Айтпақшы, науқан өтті. Ата Заң қабылданды. Қарбалас жұмыс енді басталады. Себебі, қазіргі Парламенттің мойнына тағы бір маңызды міндет жүктелгелі тұр. Қос палата мерзімі аяқталғанға дейін бірнеше заң мен кодекске түзетулер енгізуі қажет.

Қасым-Жомарт Тоқаев, Қазақстан Республикасының Президенті:

- Көп ұзамай Парламент қарауына Президент, Құрылтай, Халық Кеңесі, Астананың мәртебесі және еліміздің әкімшілік-аумақтық құрылысы туралы жаңа бес конституциялық заң енгізіледі. Сонымен қатар сегіз конституциялық заңға және 60-тан астам заңға, соның ішінде негізгі кодекстерге түзетулер енгізу қажет.

Заң шығару үдерісі алдағы парламент сайлауымен қатар жүреді, - деді Қасым-Жомарт Тоқаев. Сайлауды жаңа сессияның ашылуына дейін өткізу жоспарланып отыр. Сол уақытқа дейін тиісті заңнамалық база әзірлеуді толықтай аяқтап үлгеру керек. Ал, елді құқықтық және саяси тұрғыдан түбегейлі жаңғырту жыл соңына дейін, тіпті, келесі жылы да жалғасуы мүмкін.

Қасым-Жомарт Тоқаев, Қазақстан Республикасының Президенті:

- Алдымызда қазіргі билік институттарын реформалап, жаңасын құру, сондай-ақ олардың құрылымы мен кадрлық құрамын өзгерту міндеті тұр. Конституцияның тың қағидаттары құқықтық, экономикалық, қоғамдық-саяси өміріміздің, басқаша айтқанда, тұтас тыныс-тіршілігіміздің ажырамас бөлшегіне айналады.

Халық Конституциясы – стратегиялық сенім мандаты және ұзақмерзімді мақсаттар мен өрлеу жолына бастайтын жаңа қоғамдық келісім, - деді Мемлекет басшысы. Былтыр қылмыстық жауапкершілікке тартылғандарға жасалған рақымшылық соның дәлелі. Сондықтан Президент бірқатар қылмыстық және әкімшілік құқықбұзушылық бойынша тағы да рақымшылық жариялауға болатынын айтты.

Қасым-Жомарт Тоқаев, Қазақстан Республикасының Президенті:

- Елімізде әкімшілік істер бойынша рақымшылық алғаш рет жасалатынын атап өткім келеді. Парламент қазіргі сессияның соңына дейін тиісті заң қабылдауы керек. Бұл – Негізгі заңдағы адамгершілік идеалдары мен прогрессивті құндылықтарды қоғамда орнықтыратын маңызды қадам.

Жиын соңында Қасым-Жомарт Тоқаев елдің әлеуметтік-экономикалық дамуына, заң мен тәртіпті нығайтуға қосқан елеулі үлесі үшін бір топ азаматқа мемлекеттік наградалар табыстады. Олардың қатарында ҚР Президенті телерадио кешенінің директоры Раушан Қажыбаева да бар.

Жаңа Конституция төрге озып, тұғырына қонды. Бұл - ел дамуының жаңа кезеңін айқындайтын маңызды құжат. Оны әзірлеу барысында халықтың пікірі кеңінен ескерілді. Конституциялық комиссия 10 мыңнан астам ұсынысты қарап, мәтінін қайта жазып шықты. Енді құжат 1-ші шілдеден бастап күшіне енеді. Олан кейін Құрылтай сайлауы өтеді. Зұлқарнай Ермұратұлы, Төлеген Биссембаев ЖЖ.