V Дүниежүзілік көшпенділер ойындарында тоғызқұмалақ сайысына 41 ел тіркелген

Тоғызқұмалақтан сынға түсіп жатқандар тартысты таңғы тоғызда бастады. Спорттың бұл түрінен Дүниежүзілік көшпенділер ойындарына 41 елдің өкілі тіркелген. Ойын кестесі елдегі тоғызқұмалақ күнімен тұспа-тұс келді.

Бүгін Көшпенділер ойындарындағы тоғызқұмалақ додасының алғашқы жүрісі жүрілді. Бұл күннің таңдалып алынуының өзіндік мәні бар. Себебі біздің елде 9 қыркүйек тоғызқұмалақ күні деп белгіленген. 

Жарыс шымылдығын Федерация президентімен бірге халық қалаулылары, елімізге белгілі қоғам қайраткерлері мен танымал ойыншылар ашты. Ол үшін жарыс алаңының кіре-берісіне 9 тақта қойылған. Әр тақтаға тоғызқұмалақ отауларының аты берілген. Мұның да мазмұндық мәні зор. 

Тоғызқұмалақ – қазақтың ұлттық ойыны. Астанадағы ақыл-ой аламанына 150-ден астам қатысушы келген. Ал ойынға онлайн тіркеліп, сынға түсіп жатқардар саны 170 мыңнан асады. Дүниежүзілік көшпенділер ойындары қарсаңында қауымдастық өкілдері төл ойынның атағы асқақтасын деген ниетпен ғарышқа бір тоғызқұмалақ тақтасын ұшырыпты. 

Әлихан Бәйменов, Халықаралық және ҚР тоғызқұмалақ қауымдастығының төрағасы:

– Ғарышқа бір тоғызқұмалақ тақтасын ұшырдық. Ол, 35 шақырым жерге барып қайтты. Сонымен қатар, онлайн режимде осы үш күннің ішінде онлайн тіркеліп, Гиннес рекордын орнату шарасын бастағанбыз. Қазірдің өзінде 170 мыңнан астам адам соған тіркелді. 

Төл ойынның төрт мың жылдық тарихы бар. Бүгінде төркүл дүниеге таралып, ауқымы артқан. Мәселен, колумбиялықтар тоғызқұмалақтан арнайы үйірме ашып, мектеп оқушыларына әр сенбі сайын сабақ өткізеді. Ал, Румыния мемлекеті тоғызқұмалақтың тарихын тарқататын «Көшпенділер ойындары» деген кітап басып шығарған. Әрі, ой жарыстыратын ойындарға 8 мың баланы баулыған.