«Тарихи жарақат алған ұлт» психологиясынан арылуымыз керек

Біз тарихи жарақат алған ұлт психологиясынан арылуымыз керек. Мемлекет басшысы Ұлттық құрылтайда қоғамдық сананы жаңғырту мәселесіне ерекше тоқталды. Өткеннің қасіретін үнемі алға тартып, барлық қиындықты өзге жұрттан көру болашаққа бастайтын жол емес. Мұндай көзқарас қоғамды тек артқа тартады. Ал бүгінгі әлем түбегейлі өзгеріп жатыр. Осыған орай Қазақстан да уақыт талабына сай жаңарып, алға қадам басуы тиіс, - деді Президент.

Қасым-Жомарт Тоқаев, Қазақстан Республикасының Президенті:

- Бұрын да айтқам, қазір де атап өткім келеді: біз «тарихи жарақат алған» ұлт психологиясынан біржола арылуымыз керек. Басқа түскен қайғы-қасіреттің бәрін басқа халықтардан көру, ұлтымыздың маңдайына жазылған ащы тағдыр туралы бітпейтін пікірталастар жүргізу – кешегі күнмен өмір сүру деген сөз. Бүкіл әлем өзгеріп жатыр, бізге де өзгеретін уақыт келді. Біз -болашағы жарқын, жолы ашық жас мемлекетпіз, сондықтан уақыт көшінен қалмай, тек алға қарай жүруіміз керек.